USA-ah Chapchar Kut hman a ni

Mizo Society of America (MSA) huaihawtin May 27 leh 28, 2023 khan Indianapolis, Indiana USA-ah Chapchar Kut hman a ni a, Mizoram aṭangin Central YMA general secretary Prof. Lalnuntluanga'n a hmanpui.

Prof. Lalnuntluanga chuan Mizote chu khawi hmunah pawh awmin, ram hrang hrangah ram mi nihna nei mahila Chhinlung chhuak unau kan nihna vawng tlat turin Chapchar Kut hmangtute a ngen a, "Ramri kar danah awm mah ila chhul khat kual kan nihna hriat leh vawnhim tlat a ṭul," a ti.

Zofate kan inpumkhat nan Zo­hnahthlak hnam hrang hrang hruaitute'n mawhphurhna an neih len thu sawiin CYMA GS chuan, inpumkhatna neitura mawhphurhna hlen chhuak turin a sawm.

Chapchar Kut hman chhung hian hnam lam, zai mit ti tlai tak thlirho a ni a nih bakah, kut pual hian football leh volleyball hmanga inelna buatsaih a ni.

Prof. Lalnuntluanga hi Mizo Society of America hruaitute nen inkawmin, MSA leh CYMA-te Mizoram hmasawnna turah thawhho dan a awm em tih an sawiho. MSA hian CYMA-in ṭanpuina hna an thawhna Rs. 10,00,000 pek an remti.

CYMA GS chuan North America Mizo Christian Fellowship (NAMCF) hruaitute pawh a kawm a, NAMCF-te chuan CYMA-ten a ṭula an hman turin US dollar 5,000 (Rs. 4,13,000) pek an remti.