MSU-in HSSLC top 3 a Mizote lawmpuina hun an buatsaih

Mizo Students Union (MSU) chuan nimin khan HSSLC Examination 2023-a arts, commerce leh science a Mizo top 3 te lawmpuina leh MSU Special Award hlanna hun Cultural Centre cum Auditorium, Vaivakawnah an buatsaih a, minister K Lalrinliana'n a hmanpui.

K Lalrinliana chuan tunlai thiamna hrang hrang leh material kimchang tak hmangin lehkha zir theih a nih tawh thu sawiin, "Sang tak thleng turin duhsakna ka hlan che u. Tuna zirlai kan lawmpuite hi Mizoram tan enge ka tih theih ang tiin lehkha zir sauh sauh turin ka chah che u a ni," a ti.

Pathianin Zofate tan hun a ruat a, tuna kan tawrhna hi inpawhna ṭha lehzual leh Zofate inpumkhatna a kawk tih sawiin K Lalrinliana chuan, "Hmun hrang hranga chengte unau kan nihzia alang a, hnam movement hi kan ngaihtuah reng a ngai," a ti a, ngaihtuahna fimtak kan hman reng a ngaihthu a sawi.

Khualzahawm K Laldawngliana, MLA chuan zirlaite chu an bulṭanna a ni tih hrereng a, chhawrtlak ni tura lehkha zir turin a chah.

MSU president Samuel Zoram­thanpuia chuan MSU hmalaknaah 80% chu zirlaite tan an insawrbing thu leh 20% chu ram leh hnamin a mamawhna apiangah an hman ṭhin thu a sawi.