Truck tlân lêtte dang

Bualpui bul, Seṭhawn báwr vela NH-54 kawngpui chhia leh siam mek vanga lirthei tangkhang, truck driver leh handy­man-te swab sample endik hnuah, truck eng emaw zat chu nimin khan Assam lamah an tlân lêt a; mahse, Mizoram chhuahsan a rem rih loh avangin Vairengte leh hmun dang remchang laiah dan an ni.

Vanglaini palai zawhna chhángin Kola­sib DC Dr H Lalthlang­liana chuan, Assam lama truck tlân lêt chu social media ṭhenkhat­ah tam tak anga sawi ni mah se, an tam lutuk lo tih a sawi a, "Tlân lêt awm nual mah se, essential com­mo­dity (mipui ni tin mamawh) phurte an nih avangin an duh duha Mizoram an chhuahsan nghal mai a rem lo a, lo dang tur­in kan inhriattir a ni," a ti.

Hetih lai hian, nimin zing lam thlenga din­hmunah chuan Kolasib district-ah lirthei 748 an tangkhang a, a tam ber chu truck a ni. Lirthei tangkhang awm dan chu - Kawnpui dáia Sairang péng bul velah 64, Se-

ṭhâwn leh Thingdawl inkarah 381, Hmawngkhawthlir velah 135, Rengtetlangsang velah 61, Vairengte leh Lailapur inkarah 107 a ni a; Assam state chhung thlengin an intlar a ni.