Bru chungchanga Mizo mipui bumah MZP-in SEC an puh

MZP chuan, Mizoram Bru, Tripura-a tlànchhiate chu ráltlân an ni lo a, anmahni duh thu ngeia pém an ni tih sawiin, State Election Commission (SEC)-in raltlan (refugee) anga a tarlang chu thil dik lo a ni, tiin rang taka siamṭha turin SEC an phût. Bru chungchangah hian SEC chu Mizo mipui bumah an puh bawk.

MZP thuchhuah chuan, Mizorama VC leh LC inthlan turah, Mizorama lêt duh loa Tripura a inbenbel duh Bru-te Mizorama vote thlak phalsak an nih thu leh inthlanah an chuh ve theihna thlenga danin a phal thu SEC aṭanga August 4, 2020-a thuchhuah chu mak an tih thu a tarlang a, "Mizo mipui leh pawl hrang hrang aṭanga sawiselna a awm hnuah August 5 khan SEC chuan order thar tichhuak lehin, order hmasa a thlâk thu tarlan hi Mizo mipui bumna niin kan ngai," a ti.

August 5, 2020-a SEC-in order a chhuahah, Tripura-a awm mek Bru-te Mizorama VC inthlanah vote an thlak theih lohna tur leh candidate an nih theih lohna tur tarlan a nih loh avangin, order chu Bru-te vulh tumna leh Mizo mipui bum tumnaa an ngaih ngheh tlat thu MZP chuan a tarlang a ni.

MZP chuan, Mizoram sorkar leh SEC-in Tripura-a awm Bru-te Mizoram VC electoral roll aṭanga paih theihna hun remchang a awm laia an paih lo chu an dem thu an sawi a, "Cental Sorkar, Mizoram sorkar leh Tripura sorkarte'n Tripura-a awm tura inremna an siam vek tawh Tuikukte'n Mizoram VC election 2020-a vote an la rawn nei leh election-a an la chuh thei hi kan ngai thiam lo tak zet," an ti a; a rang thei ang bera electoral roll aṭanga paih turin thuneitute an ngen.