Forest reserved-ah pass kan pe lo - Revenue dept.; Forest dept.-in pass nei 1,335 an chhinchhiah thung

Land Revenue & Settlement (LRS) dept. chuan Mizoram chhunga ramngaw humhalh (forest reserved) chhungah revenue pass pek an neih an hre lo. Hetihlai hian Environment Forest & Climate Change (EFCC) dept. chuan forest reserved chhunga revenue pass nei mi 1,335 an chhinchhiah tawh thung.

RTI Act hmanga zawhna LRS dept. chuan chhangin, forest reserved chhunga revenue pass pek an neih an hriat loh thu an tarlan rualin, revenue pass pek turah hian land committee/local council hriatpuina thil telin sorkarah thuthlukna (govt. decision) siam tura thawn ṭhin a nih thu a tarlang tel a ni.

LRS dept. chuan reserve forest, innerline, roadside leh riverine reserved chhungah mimal hnena pass pek an neih hriat a ni lo tih tarlangin, "Reserved forest huam chhungah valid pass nei an awm a nih chuan sorkarin a ṭul angin emaw, dan hmangin hma a la ṭhin," an ti.

LRS dept. tarlan danin, ram/in hmun reitak mahni ta anga cheibawl, revenue pass la nei lo chuan prescribed application form-ah diltu EPIC, Aadhaar Card, Zoram Chhiah pekna thil telin Assistant Director of Survey / Assistant Survey Officer-ah a thehluh theih a ni.

Thehluh a nih hunah surveyor-in tehfelin, ramrite aṭangin NOC lain land committee/ local council-te recommendation thil telin sorkarah thutlukna siam tura thawn ṭhin a ni.

Hetihlai hian, RTI Act hmanga zawhna chhangin EFCC dept. chuan, forest reserved-ah hian hriat theih chinah revenue pass nei 1,335 an awm tling tawh tih an tarlang a, "Chhui chian mek zel a ni a, tuna hriat theih bak aia tam hi a awm ngei rin a ni," an ti.