Mau hmanga Mizoram tihhmasawn Chief Minister-in a ngai pawimawh hle - Dy. CM

Deputy chief minister Tawnluia chuan nimin khan Aijal Club Park-ah 'Horticulture Fair 2023' a hawng a; district tin aṭanga thlan mi 11 hnenah Best Farmer Award 2023 a hlan nghal. Dy. CM chuan, "Mau hmanga Mizoram tihhmasawn chu Chief Minister-pawhin a ngaipawimawh hle" a ti.

Tawnluia chuan, kut hnathawktute chu hnam rohlu an nih thu a sawi a, "An thawhrimnate hi a fakawm a, Mizoram hmasawnna sulsutu pawimawh tak an ni. Mizo­ramin leilung hausakna a neih sa hmanga ‘economy’ khaikanna tur remchang a neih langsar ber pakhat chu ‘bamboo development’ a ni a, mau hmanga Mizoram tihhmasawn hi Chief Minister pawhin a ngaipawimawh hle. Hmasawnna hi vawi khatah a lokal nghal vek thei lo a, dawhthei taka nghah a ngaih chang a awm fo," a ti a, dawh­theihna nei turin Mizoram mipuite a ngen.

Kut hnathawktute hmakhua ngaiin sorkarin theihtawp a chhuah nia sawiin Dy. Chief Minister chuan, "SEDP hnuaiah pawh sum tam tak a dah a, hlawhtlinna chang turin taima taka thawh a ṭul. Kut hnathawktute thawhrimnate a thlawn mai loh nan anmahni ṭanpui leh dawmkang turin sorkar department-an awm reng a ni," a ti.

He hunah hian MLA pahnih - Prof. F Lalnunmawia leh Dr K Pachhunga te pawhin thu an sawi a; Horticulture addl. director L Lalhmingmawia Pachuau tarlan danin, Horticulture Fair hi kum 2012 aṭanga neih ṭan a ni a; kum 2012-2022 chhunga stall neituten an hralhchhuah tawh zat chu Rs 285,77,358 a tling. Kumin hian stall 177 an awm a ni.

Fair-ah hian Mizoram pawn aṭangin mau aṭanga thilsiam zuar ṭhin - Beyond Terry Towels, Maharashtra, Bamboo and Cane Development Institute (BCDI), Agartala, Tripura, National Institute of Design (NID) Bengaluru leh North East Cane and Bamboo Development Council (NECBDC), Burnihat, Assam-te sawm niin, stall an siam.

Dy. CM hian district tin aṭangin kut hnathawktu hlawhtling mi pakhat zel thlanchhuahte hnenah ‘Best Farmer Award 2023’ lawmman a hlan a, award hian lawmpuina thuziak leh Rs 10,000 a keng tel.