Zirna siamṭhat kan ngai pawimawh - MPCC President
Congress party zirlai pawl NSUI, Mizoram chuan nimin khan Vanapa Hall-ah HSLC leh HSSLC topper-te chawimawina hun an buatsaih a, an hun hmanpuitu MPCC president Lalsawta chuan an party-in Mizorama zirna siamṭhat an ngaih pawimawh thu a sawi.
Lalsawta chuan Mizoramah ramdanga an neih ang leh an tih dan tam tak chu kan nei ve vek tih sawiin, "Mah se, kan lo kalpui thin danah leh sorkar chakna hmanga zirlaite kan enkawl danahte pawh kawng thar (reforms) tam tak kan neih a ngai. Mipuiin sorkar sikul aia private school an thlang tlatte thleng hian sorkar tan chuan siamṭhat tur a tam tih a chiang. Hei hi Congress party chuan kan ram mamawh a nih dan kan hria a, reforms ngai tam tak zingah kan ngaih pawimawh a ni," a ti.
Politics chu ram leh mipui tih hausakna tur a ni tih sawiin MPCC President chuan, "Kan ram hian tih tak zeta ram tana thawk tur a mamawh a, vawiinah hian aw rawl chhuahin ram hmangaihtute a aukhawm mek a ni. Politics hi mimal hausakna tur a ni lo a, ram leh mipui tih hausakna hmanrua a ni tih hriaten kan party an rawn bawr khawm tan mek," a ti a, zirlaite chu politics ngaihtuah turin a chah.
Lalsawta chuan zirlaite tan bank aṭanga study loan lak a harsa tih sawiin, "Ngaihtuahna thar hmanga sutkian a nih chuan dingchhuak thei, kan ram rohlute hi vawiinah harsatna hrang hrangin tlakbuak rih che u mah se, in theihna hmang ṭangkai turin Congressparty chuan kan sorkar theih phawt chuan remruatna tha leh tluantling siam kan tum," a ti.
Thusawitu dang, MPCC vice president Lal Thanzara chuan thawh-rimna leh huaisenna chu zirna kawnga hlawhtlinna a ni tih sawiin, "Mathe-matics avanga tum thum ngawt matric failed ka ni. Mah se, Pathianin hriatna min pekte tipung turin theihtawpin ka bei a, master degree hial ka zo ve thei," a ti a, Pathian leh mipuite duhsakna changin ram tan hna a thawh ve theih phah thu a sawi.
Zirlaite lawmpuina hun hi NSUI vice presi-dent Lalmuanawma'n kaihruaiin, Nihar Kanti Chakma, MLA leh NSUI president RB Lalmal-sawmate pawhin thu an sawi.