Thla 6 chhungin Champhai dist.-ah HIV+ 69 hmuchhuak; Mipat hmeichhiatna hman avanga kai an tam ber

31st May, 2023

Champhai District Development Co-ordination & Monitoring Committee (DDCMC/DISHA) chu an chairman C Lalrosanga, Lok Sabha MP hoin DC conference hall-ah an ṭhukhawm. October 2022 - March 2023 chhung khan Champhai district-ah thisen endik 3,306 zinga 69 (2.08%) chu HIV hrik pai an ni a; heng zinga pasarih chu naupai lai niin, HIV positive zingah mipat hmeichhiatna hmanga kai an tam ber tih tarlan a ni.

C Lalrosanga chuan, DISHA meeting-in a huam centrally sponsored scheme (CSS)-te Mizoramah ṭangkai taka chhawr a ni chu lawmawm a tih thu a sawi a, "Sorkar laipuiin information technology leh digitization lamah nasa taka ṭan lain kalphung a thlak a, harsatna kan tawh loh nan hemi kawngah pawh hian theihtawp chhuaha kan insiamrem ve zel a ṭul," a ti a; sorkar scheme pawimawhte mipuiin an hmelhriata an chhawr ṭangkai theih nan zau zawka inhrilhhriatna leh inzirtirna neih a ṭul thu a sawi.

Ṭhutkhawma tarlan danin, October 2022 aṭanga March 2023 chhung khan Champhai district-ah nau piang 862 leh thi 12 awmin, IMR chu 20.88 a ni a; nu nau chunga thi pakhat awmin, maternal mortality rate (MMR) chu 116 a ni. Mi nawlpuiah HIV test tihsak mi 1,944 zingah 62 (3.19%) an positive a, naupai mi 1,362 test zinga 7 (0.51%) an positive bawk a; HIV positive zingah mipat hmeichhiatna hmanga kai an tam ber.

Vector Borne Disease Control Programme kaltlangin malaria vei pakua (Pf 6 leh Pv 3) hmuh a ni a; TB vei hmuh chhuah 68 zinga panga an thi.

Champhai district-ah ration card leh Aadhaar card thlunzawm hna 99.21% zawh tawh niin, beneficiary nena thlunzawm hna chu 94.16% zawhfel tawh a ni a; AAY Card 1,824 hnuaiah beneficiary 4,196 leh PHH Card 9,381 hnuaiah beneficiary 41,212 awmin, a thlawnin buhfai quintal 16,428.40 pek an ni. One Nation One Ration Card kalpui mek a ni.

National Social Assistance Programme (NSAP) hnuaiah tar chawmna/ tar pension mi 1,337, hmeithai pension mi 153 leh rualbanlo pension mi 37-te pek mek a ni bawk.

Ṭhutkhawma tarlante
◆ MGNREGA hnuaiah kum 2022-2023 chhungin job card holder 18,132 hnenah ni 100 inhlawhna siam a ni.

◆ PMAY-G Awaas+ 2021-2022 hnuaiah insak hamṭhatna dawng tur mi 372 thlan an ni a, heng zinga 209 hnenah first installment pek a ni.

◆ WDC-PMKSY 2.0 hnuaia hmalakna project pahnih - cheng nuai 700 ve ve senna tur kalpui mekah sokar laipui tum tur fund 19.45% hmuh a ni tawh.

◆ BADP hnuaiah hna 17, cheng nuai 253 senga thawh niin, heng zinga 16 hi zawhfel tawh a ni.

◆ MzSRLM hnuaiah SHG 648 din a ni.

◆ Mission Amrit Sarovar kaltlangin hmun 80-ah dil/tuikhuah siam zawh a ni tawh.

◆ Jal Jeevan Mission (JJM) kaltlangin project 12 zawhfel a ni.

◆ Kum 2022-2023 atana Champhai district khaw 30-a tuilakna leh in tina tui connection pekna tur project kalpui mek a ni.

◆ NABARD RIDF- XXVIII hnuaiah Farkawn Water Supply Scheme (Solar pumping) cheng nuai 1595.72 hmanga siam tur tender chhuah fel tawh a ni.

◆ NLCPR hnuaiah cheng nuai 1,988 senga siam Keilungliah lui khuah chu hawn fel a ni tawh.

◆ PWD hnuaiah PMGSY kawng pali - km 53.9 a thui siam zawh a ni.

◆ PMKSY ‘Har Khet Ko Pani’ hnuaiah minor irrigation project pasarih leh NABARD hnuaiah project pakhat kalpui a ni.

◆ Ground Water Irrigation Scheme kaltlangin leihnuai tui verh hmanga tuilakna tur project pali kalpui zinga pakhat hawn a ni tawh.

◆ P&E dept-in NABARD RIDF kaltlangin zaù paliah electric power pekna tur an buaipui a, project pakhat an zo tawh.

◆ Health sub-centre 30 chu Health & Wellness Centre-ah hlankai vek an ni a, Sub-Centre Clinic 15 siam a ni bawk.

◆ Samagra Shiksha kaltlangin cheng nuai 225.48 sengin sikul sak ṭhat, toilet leh tui dahkhawlna siam hnate thawh a ni.