RD minister ka nih hnuah kum li chhung ni 100 inhlawhna kan siam zat zat - Lalruatkima

Rural Development (RD) minister Lalruatkima chuan May 29, Thawhṭanni khan Lawngtlai RD department hnuaia District Rural Development Office (DRDO) leh Block Development Office (BDO) a tlawh. Minister chuan, RD minister a nih hnuah kum 4 chhungin kum tin ni 100 inhlawhna siam a nih thu leh kum thar 2023-24 ah pawh siam leh ngei an tum thu a sawi.

Lalruatkima chuan, RD department hnuaia thawktute inpekna leh thawhrimna avang leh mipuite nena thawhhona ṭha a awm avangin Mizoram chu India rama scheme leh project ti ṭha berte zingah a tel thu a sawi a, "RD Minister ka nih hnuah kum 4 chhungin MGNREGS-ah ni 100 inhlawhna kan siam zat zat thei a, kumin kum tharah pawh ni 100 inhlawhna siam leh theih beisei a ni. Kum 5 chhungin 'ni 100 inhlawhna' tih hming putu MGNREGS chu a hming ang ngeia dik taka kalpui theih a ni tur hi a lawmawm hle," a ti.

RD department hnuaia scheme hrang hrang kaltlangin Mizoram hmun hrang hrangah hmasawnna ruhrel din a nih thu sawiin RD Minister chuan, "Thingtlang kilkhawr ber thlengin hmasawnna ruhrel tam tak din a ni a; tuihna humhalh leh tihpun kawngah te, faina leh thianghlimna kawngah leh mipuiin eizawnna ngelnghet an neih theih nante hmalakna kalpui niin, hmasawnna hmuh tur tam tak a awm," a ti a, office building leh thawktu quarters thar sak belh a nih bakah, thawktute hamṭhatna hrang hrang pawh ngaihtuah niin, hmasawnna tam tak a awm thu a sawi.

RD Minister chuan RD department-a thawktute chu anmahni dawrtute'n an hriat thiam loh leh an hriat duhte dawhthei taka lo hrilhfiah a, mi retheite innghahna leh tlûk luh ngamna nih tum zel turin a chah a; sorkar hnathawkte tan social media hman dan thiam a pawimawh thu leh an thiamna tuai hriam a, ṭha lehzuala hna thawh tum zel turin a chah bawk.

Lawngtlai DRDO-ah hian Minister hian thawktute a kawm a; an hnathawhna kawnga harsatna leh mamawh an neihte bakah, hmasawnna tur hrang hrangte an sawiho a ni.