Khaw 500-ah free wifi connection pek tum a ni - Robert Romawia Royte

Aizawl Common Service Center Society chuan nimin khan Taxation auditorium-ah Annual General Body Meeting an nei a, Information & Communication Technology (ICT) minister Robert Romawia Royte in a hmanpui. Minister chuan, VSAT hmanga tuam thar khaw 500-ah free wifi connection pek tum a nih thu a sawi.

Robert Romawia Royte chuan, ICT dept.-in Mizoram budget aṭangin cheng nuai 507.38 chauh a neih thu a sawi a, "Thawktute hmalakna zarah Mizoram budget pawn aṭangin hmasawnna hnathawhna tur cheng nuai 9,200 zet an nei a, Mizoram sorkar department-te chu state budget-ah chauh innghat loa Union Budget-a hmasawnna sum awmte haichhuah kawngah ṭan lak thar a ṭul. VSAT hmanga tuam thar khaw 500-ah free wifi connection pek tum a ni," a ti.

Aizawl Common Service Center Society-te chu hun lokal zel turah ṭha taka sorkar thawhpui zel turin ICT Minister chuan a ngen a; common service center (CSC)-te'n mipui rawngbawlna hna hun rei tak an lo thawh tawhnaah lawmthu sawiin, zau zawka vantlangin an hnathawh an hriat theih nan ṭan la turin a fuih nghal.

He huna tarlan danin, Mizoramah CSC 940 a awm mek a, sorkar kum liamta 2022-23 chhung khan transaction 1,16,000 neiin, cheng nuai 260 an thawkchhuak a ni.

Minister tarlante
▶ ICT Dept.-in Mizoram budget pawn aṭangin hmasawnna hnathawhna tur cheng nuai 9,200 an nei.

▶ PMJVK scheme hnuaiah IT Development Training Center din nan cheng nuai 690 sanction a ni tawh.

▶ Village Knowledge Center 15 din nan NABARD hnuaiah cheng nuai 427.35 hmuh a ni.

▶ VSAT hmanga tuam thar khaw 500-ah free wifi connection pek tum a ni.

▶ Changtlung zawka internet leh mobile connectivity pekchhuah a nih theih nan khaw 79-te chu Optical Fibre Network hmanga thlunzawm an ni dawn.

▶ Khaw 79-a Optical Fibre Network thlunzawm nan SASCI Part-V hnuaiah cheng nuai 5,000 hmuh a ni.

▶ State Data Center tihchangtlun nan SASCI Part-IV aṭangin cheng nuai 2,250 hmuh a ni.