Screen hmaah hun hmang tam lo a, lehkha chhiar tam turin MLA-in a fuih

MZP Sub-Head-quarters, Lungsen chuan nimin khan Lungsen North Branch YMA Hall-ah kum 2022-2023 chhunga an khuaa HSLC pass-te lawmpuina an buatsaih a; bialtu MLA Zodintluanga Ralte-in hmanpuiin, zirlaite chu screen hmaah hun hmang tam lo a, lehkha chhiar uar turin a fuih.

Zodintluanga Ralte chuan, Lungsen khuaa zirlai hlawhtlingte a lawmpui thu sawiin, "Tuna la hlawhtling ve lote tan hun ṭha a la inher dawn a, tun hi kan tawpna a ni lo a, bul kan ṭanna chauh a ni. Zirnaah a pawimawh ber chu beidawn loh a ni," a ti.

Covid-19 avangin kum 2020 aṭangin zirna kalpui dan nasa takin a danglam tih sawiin Zodintluanga chuan, "Loh theih lohin online lam hawiin kan kal a, phone, laptop leh a kaihhnawih screen lam kan bih nasa hle," a ti a; naupang aṭanga upa lam thlengin off-screen time insiam tam a ngaih tawh thu sawi.

Thorang bialtu MLA chuan, hunbi insiama screen hmaa hun hman leh inkhuahkhirh a ṭhat rualin, zawm a har avangin ṭul leh mamawh tak takah lo chuan khawih loh a ṭha ber tih a sawi a, "Naupang awmtlei nana phone pekte avanga harsatna hi a takin Mizoramah ngei kan natna hmachhawn lian tak a ni mek a ni," a ti.

Zodintluanga Ralte chuan, kumin HSLC leh HSSLC-a zirlai ti ṭha bikte chu social media khawih tam lo, screen hmaa hun hmang tam lo an ni tih sawiin, "Lehkhabu chhiar tam bawkin a ler lam zel an luah a ni," a ti a; zirlaite chu lehkhabu chhiar tam turin a fuih a ni.

Zirlai chawimawinaah hian Lungsen khua aṭanga HSLC pass mi 21 hnenah chawimawina hlan a ni.