KHAWTHLIR
Endiktu turte an lo thleng
National Medicinal Plants Board leh Ministry of AYUSH-a ramhmul damdawi chinpun leh sawngbawl kawnga mithiamte chu nimin khan Mizorama hmalak tawhnate endik turin Aizawl an rawn thleng a, Health minister Dr R Lalthangliana a pisa-ah an kawm. Monitoring visit hi ni 5 chhung kalpui tura ruahman a ni.
Vairengte College
Vairengte khawtlang leh an bialtu MLA Lalrinsanga Ralte ṭangkawp chuan Vairengte College an din a, July, 2023 aṭangin class ṭan a ni dawn. Vairengte College-ah hian principal bakah zirtirtu paruk leh LDC pakhat an awm dawn. Thawktute July - December hlawh tur chu Bialtu MLA-in a tum a phawt dawn a, a bak chu an ngaihtuah leh ang.
Green Mizoram Day
Kolasib district bawrhsap John LT Sanga kaihhruaiin nimin khan DRDO conference hall-ah sorkar hotute'n Green Mizoram Day hman dan tur an rêl. Day pual hian Kolasibah a thlawna sem tur thing ṭiak 10,000 ruahman a nih thu tarlan a ni a; Excise & Narcotics department complex, Khuangpuilam leh BDO Thingdawl compound-ahte thing phun ni se, an ti.
Tui chhung luhna hlan
Aizawl West-I bialtu MLA Zothantluanga chuan nimin khan a bial Sairang khawtlang hruaitute hnenah tui chhung luhna hmanrua (scuba equipment) a hlan. Zothantluanga chuan, "Kan sorkar leh VC-te nena kan hmalakna a zarah hetiang hmanraw changkang leh ṭha, man to tak mai kan nei thei ta hi Aizawl mipui mai bakah Zoram mipui tan chanchin lawmawm tak a ni," a ti.
Minister-in hawng
Rural Development (RD) minister Lalruatkima chuan nimin khan Bungtlang South-a Block Development Office-cum-Panchayat Bhavan building sak thar leh RD department Rest House thar a hawng. RD Minister chuan, BDO pisa chu mipuiin an harsatna an thlen a, sut kiansak an nihna hmun tur a nih thu a sawi.
Media training
MNF, Serlui North leh South block-te chuan nimin khan Bilkhawthlir VC Hall-ah Media & Political Training an buatsaih a; an hun hmanpuittu MNF Gen. Hqrs adviser J Malsawmzuala Vanchhawngin hmanpuiin, "MNF chu Mizo nationalism kengtu kan ni a, kan hnam, kan ram leh kan sakhua a him zelna tura thawktu kan ni. Kan innghahna thupui chu 'Pathian leh kan Ram tan', tih a ni a. A chhe thei ang bera thudik ziak tluak lo leh dawt hmangtein beih kan tawk ṭhin. Sawiselna leh deuna karah pawh kan Pathian chu kan vuan tlat a, chhe lailet dera puhna karah pawh Pathianin min hruai zel a ni," a ti.
Kawng khar dawn
Ainawn Veng, Bethel Road chu vawiin aṭanga June 8, 2023 thleng ni tin zing dar 9 aṭanga tlai dar 5 inkarah siam a nih dawn avangin helai kawng hi khar tur a nih thu Aizawl Traffic SP-in a tarlang a; hnathawh tibuai thei tura lirthei leh bungrua dah phal a nih loh thu a tarlang bawk.