NH-54 siam hna thawh mek enfiah
Road & Infrastucture Development Board (RIDB) chuan an vice chairman H Lalzirliana, MLA hoin nimin khan PWD hotute nen Sairang leh Khamráng inkar leh, Thingdawl leh Kolasib inkara NH-54 kawngpui chhe zual laite a hmuna kal chilhin, kawng siam mek an enfiah.
H Lalzirliana chuan, Mizoramin ei leh bar a lâk luhna kawngpui pawimawh NH-54 chu hman theih loha a awm lohna atan kawng enkawltu NHIDCL, contractor-te leh Mizoram PWD hotute chu chak taka hna thawk turin a hrilh.
RIDB member-te'n kawng an enfiahnaah hian kawng siam hna thawk mektu JR Construction leh C Lalhluna te koh an ni a, hna an thawh dan leh harsatna an neihte an sawipui. Specification ang taka
ṭha (quality) taka siam tur leh theihtawp chhuaha thawk turin an hriattir a, harsatna an neih chuan puih an inhuam thu an hrilh bawk.
RIDB hian NH-54 bakah, Bairabi rel chawlhhmun panna by-pass road, buhfai leh bungrua thlengte phurh chhuahna kawng hman ber pawh an tlawh a, kawng chu siamṭhat vat ni se, an ti. RIDB-te hian an chairman - Chief Minister hoa meeting-a an thurel bawhzuiin Mizoram hmun hrang hranga kawngpuite dinhmun endik vek an tum a, hlawm pahnihah inṭhenin kawng endik hna an thawk a ni. Team dang chuan hmâr tlangdung leh khawthlang lam an fang mek a ni.