A fanu pawngsual ṭhintu kum 12 hrehawm taka tang turin hrem

A fanu ṭum eng emaw zat pawngsual a, ràitu chu Special Judge (POCSO Act) Vanlalenmawia'n kum 12 chhung hrehawm taka jail tang tur leh Rs. 5,000 chawi turin a hrem.

Special Judge hian a fanu pawngsualtu hi May 29, 2023 khan thiam loh a chantir a, a hremna hi nimin khan a puang.

Rs. 5,000 hi a chawi thei lo a nih chuan kum 12 bakah ni 25 dang jail-ah a tan belh ang.

Tarlan tawh angin, Special Judge-in thiam loh a chantir tâk hian August 5, 2013 khan a fanu kum 14 mi chu ramhnuaia thing an phurhnaah a pawngsual a, a hnuah pawh a pawngsual chhun­zawm ṭhin. September 2015 khan pawngsual tawktu hian a pa fa a hring.

A pa hian kum 2018 thleng khan a fanu hi a pawngsual ṭhin a, a pawng­sual hnuhnun ber chu August 2018 nia hriat a ni.

November 22, 2018 khan a nuin Saitual Police Station-ah FIR a thehlut a, police-in an man. Pawngsualtu hi Central Jail-ah a tang mek.