Mizorama zirna hrim hrim hi a bulthùm aṭanga din thar a, tuai thar a ṭul - MYC Chairman

Lunglei Govt. High School chuan nimin khan an sikulah kum 70 an tlin awmna pakhat atan Science Exhibition an buatsaih a, Mizoram Youth Commission (MYC) chairman Dr Vanlalṭanpuia, MLA-in a hman pui.

Dr Vanlalṭanpuia chuan, zirna lamah khaw­velin zau zawkin hma a sawn zel tih a sawi a, "Kan rama zirlaite pawhin zirna leh zir tur zau zawk inhawng mek hi a hlawhtlinpuitu ni tura rilru an siam a pawimawh. Mizo ṭhalaite lan dan leh inchei dan a changkan tawh viau laiin, zirna khawvela an tlahniam zel hi a lungchhiatthlak a, Mizorama zirna hrim hrim hi a bulthùm aṭanga din thar a, tuai thar a ṭul," a ti a; zirtirtute pawhin an zirlaite formula vawn tir ringawt loa khawvela zirna sang leh zau zawk thlir pha tura an hriatna an tihzau a ṭul thu a sawi.

Science Exhibition-ah hian Lunglei khawpuia Middle School pali leh High School pathum aṭangin team 18-an tel a; High School-ah Govt. HS Lunglei zirlai Lalram­ngaihzuali leh David R Biakhmingthangate pakhatna an ni a, Middle School-ah Baptist English School, Serkawn zirlai Brianna Lalngaihawmi leh Lalrozami Pachuaute pakhatna an ni.