NIELIT aṭanga diploma neite'n LDC dil thei loh chhan zirchian tum

Governor Dr Hari Babu Kambhampati chuan nimin khan Raj Bhavan-ah National Institute of Electronics & Information Technology (NIELIT), Aizawl hotute a kawm. Larsap chuan, NIELIT aṭang diploma neite'n Mizoram sorkar hnuaiah LDC hna an dil ve thei lo chu zirchian a tum thu a sawi.

Dr Hari Babu Kam­bhampati chuan, tun­laiah computer thiam a pawimawh tawh thu leh IT literacy-ah ṭan lak a ngaih thu a sawi a, "Sorkar laipui hnuaia din, zirna pawh sorkar laipui duh dan thlapa duan NIELIT hnuaia computer thiamna zir chu state chhung leh pawna hna zawng tur tana thil pawimawh tak a ni," a ti a; NIELIT-in computer leh a kaihhnawih thil zirtirna hrang hrang a kalpuite chu ṭha thawkhat nia a hriat thu sawiin, theihtawp chhuah chhunzawm turin a chah.

NIELIT, Aizawl hotute chuan Larsap hnenah hian zirna an kalpui dan leh harsatna an neihte an thlen a; Larsap chuan NIELIT aṭanga diploma neite'n Mizoram sorkar hnuaiah LDC hna an dil ve thei lo chu lo zirchian a, sorkar thuneitute sawipui a tum thu a hrilh.