PHE Minister-in tui lâkna siam mek a tlawh

PHE department enkawltu deputy chief minister Tawnluia chuan nimin khan Aizawl khaw­­pui tui hasatna sutkian­­na tura ruahman mek, 'Alternate Gravity Water Supply Scheme of Aizawl' (AGWSSA) bawhzuiin, Hualtu khaw dái Dilzawla tui khuahna hmun a tlawh.

Sorkar thuchhuah tarlan danin, AGWSSA hi Aizawl chhim lam chuàn hnuai veng ṭhenkhat - Mualpui leh Mission Vengthlang te, Zoram Medical College leh Chhimphei tlangdung khaw ṭhenkhata mi nuai hnih vel fùr lai (thla 5-6) vel chhunga châwm thei tura duan a ni a; Ministry of DoNER-in NESIDS hnuaia thawh tura a ruahman, cheng nuai 1,1730.35 senna tur a ni a, sum hi sorkar laipuiin a tum vek tur a ni.

Tuikhuah leh hna­thawh turte thawktu atan Kram Infracon Pvt. Ltd. leh Vikash & Associates (JV), Noida thlan an ni a; September 12, 2019-ah hna thawh ṭan niin, March 2024-ah zawh hman beisei a ni.

Tawnluia chuan, hma­lakna chu a thlen chinah ṭha a tih thu sawiin, "Fùr ruahtui tlan theih tur ruahmanna a nih avangin a nghahhlelhawm tak zet a ni," a ti a; Hualtu khaw mipuite chungah a lawm thu a sawi.

PHE Minister chuan, tuihna humhalh leh tihchangtlun zel chu mi tin mawhphurhna lian ber zinga mi a nih thu sawiin, "Mi tinin tih tak zeta kan vei a, kan theihna zâwn ṭheuhah ṭan kan lak zel a ngai. Kumin chhung ngeia Ṭawi tlang tui hi mipui, a chhawr ṭangkai turte hnena thlentir hman kan tum," a ti.

AGWSSA hian Hualtu khaw dai, Dilzawl hmuna Tuikum leh Lunglei lui hnár bakah, ruahtui khâwl (rain water harvesting) a ring dawn a, tuikhuah (earthen dam) chu metre 14-a sang niin, a chhîp sei zawng metre 75 leh a zau zawng metre 3 a ni. A mawng chu metre 82-a zau a ni a, tuikhuahin a chîm chin chu hectare 4.1 niin, tui litre nuai 740 dawng tura ruahman a ni.

Tuikhuah aṭangin lei hìpna (gravity) hmangin pipe inchi 18-a lian, km. 39-a thuiah tui lak chhuah a ni dawn a, Hualtu-Khumtung-Muallungthuah kalin, Muallungthu tlanga tuizém litre 15,00,000 dawngah ni tin tui litre nuai 120 chhùn luh tum a ni.

Tuikhuah siam hna 85% zawh a ni tawh a, water treatment plant sak hna 95%, pipe phùm hna 75% leh tuizem lian siam hna 98% zawh a ni tawh bawk.