Inthlanah pawisa chakna tihbo kan tum - MPCC President

Aizawl District Congress Committee (ADCC) huamchhung Block Leaders’ Conference chu nimin khan Lal Thanhawla Auditorium-ah neih a ni a, an hun hmanpuitu MPCC president Lalsawta chuan, an party-in inthlanah pawisa chakna tihbo an tum tlat thu a sawi.

MPCC President chuan anni aia dinhmun ṭha lo ve leh chhawngte tan hna an thawk dawn tih sawiin, "Chu'ng mite humhima dinchhuah tir hi kan tum. Chuvang chuan Congress party chuan inthlana pawisa chakna tih bo hi kan tum tlat a, kan tum chhan chu keini aia rethei leh zual zawkte tana thawk tur kan nih vang a ni. Ram siamṭhat kan duh tak tak chuan he thil hi kan tih ngei angai a, kan hotute pawhin candidate-te ti hautak lo zawnga ruahmanna kan siam a ṭul tak zet a ni," a ti.

Lalsawta chuan rinawm taka an din ngheh tlat avangin mi ṭha tak tak Congress-ah an lut tawh nia sawiin, "Mi ṭha tak tak ten min rawn la belh zel dawn. Heng mi ropui leh hmingṭha tak tak lo lut tawh leh lo lut mekte hian rawn luh duh chhan an nei a; chu chu kan party policy-ah hian mipui an lal ber ṭhin a, tun ṭumah pawh hian an lal ber dawn nia an hriat vang niin kan hria. Heng mi huaisente zarah leh keini a chhunga mi huaisente zarah hian Mizoramah sorkar ṭha kan siam leh na tur kawl a êng niin ka hria," a ti a, huaisen taka theihtawp an chhuah chuan an sorkar ngei tur thu a sawi.

Politics-a an awm chhan chu thil ṭha tih a nih thu sawiin Lalsawta chuan, "Kan thil ṭha tih tam tak zingah Dr Lal Thanhawla hoa kan din Falkawn Referral Hospital leh Tuirial Hydel Project ringawt pawh hi ropui tak a ni. Congress party hian thil ṭha tam tak kan ti tawh ṭhin a, kan thil ṭha tihte hi kan sawi uar ve pawh a ṭul hle. Chu'ng zawng zawng chu Congress party in lo thlan tlin ṭhin tawh vang a ni a, in zar liau liau a ni," a ti.

Inkhawmah hian MPCC Media chairman Dr Lallianchhunga'n an party manifesto no. 1 'Ṭang Puihna' tih a lem nen a sawifiah bakah, 'Ṭang Puihna' video tlangzarh a ni.