Smart phone chhiatpui tam tak an awm chho mek - Zodintluanga

MSU Sub-Headquarters, Lungsen chuan nimin khan an khua-a pawl 12 pass tharte lawmpuina hun an buatsaih a, an hun hmanpuitu bialtu MLA Zodintluanga Ralte chuan, smart phone chhiatpui tam tak an awm chho mek niin a sawi.

Zodintluanga chuan smart phone hi a pawimawh tawhin, mi tinin an nei fur tawh tih a sawi a, "Ṭhalai nangni ang rualah hian hmangthiam lo leh chhiatpui tam tak an awm chho mek. Nangni chuan hunbi neia hman hram hram tum rawh u. Zirlai kan nihin phone khawih loh tur tiin kan inzilh ngawt thei lo a, tihtur leh rilru dang lakpenna tur kan dap thiam a pawimawh hle dawn. Lehkhabu chhiar tam bakah taksa sawizawina lam pawh kan uar thar a ṭul hle," a ti.

Zirna leh thiamna chu tuma chhuhsak theih loh ro kan neihna tur a nih thu sawiin, "Kan ramin human resource development hi kan uar deuh deuha kan sukthlek lam a nih a ngai tawh," a ti a, ram lian lo tak Israel, Japan leh South Korea-te pawh mihring chhawr tlak an chherchhuah tam avanga ropui an nih thu a sawi.

Thorang Bialtu MLA chuan Lungsen aṭangin hmundanga lehkha zir tur an tam tawh dawn thu sawiin, "He hun hi mitam takin hmang thiam loin an chhiatphah ṭhin. Mi hlawhtlingte hi nu leh pa thuawih mai bakah taima taka bei hram hram an ni zel. Chuvangin in nu leh pa leh chhungte ti rilru na zawnga awm lo tur leh hlawhtlinna sang zawk nei zel tur a tan lak a pawimawh hle dawn a ni," a ti.

Kumina HSSLC exam result chhuakah khan Lungsen khua aṭang hian zirlai mi 19 ten an pass a ni.