Validation Workshop on State Energy Efficiency Action Plan

Power & Electricity department hnuaia State Designated Agency (SDA) Electrical Inspectorate, Zuangtui chuan nimin khan Hotel Regencey-ah Mizoramin energy – kawlphetha, tuialhthei, adt. renchem leh daihzai zawka a hman theihna tur 'State Energy Efficiency Action Plan (SEEAP)' tlangzarhna leh sawihona an buatsaih.

He huna tarlan danin, SEEAP hi Bureau of Energy Efficiency (BEE), Ministry of Power kaihhruaina hnuaiah Mizoram tan Deloitte leh Green Tree-te chuan zirchianna neiin, energy hrang hrangte renchem leh daihzai zawka hman a nih theih dan tur ruahmanna leh kalphung turte an siam a ni.

Khawvel lum belh zel tur dona kawnga India hmachhawp neihte tihhlawhtlinna tura Mizoramin a phaktawka hma a lak theih dan tur hrang hrang ruahman a ni a, hemi atan hian – building sector, industry sector leh transport sector-te thlangchhuakin, kawlphetha leh tuialhthei renchem leh daihzai zawka hmanral a nih theih dan tur kalphung leh kaihhruainate duan a ni.