One Day Exhibition on Waste to Wealth
Mizoram Pollution Control Board (MPCB) hnuaia Mizoram EIACP Hub chuan nimin khan Chanmari YMA Hall-ah ‘One Day Exhibition on Waste to Wealth’ an buatsaih a, MPCB member secretary C Lalduhawma'n a hawng.
C Lalduhawma chuan, ram changkang zawkah chuan bawlhhlawh paih mai mai tur an nei vak tawh lo tih a sawi a, "Thil dang hman tlâk siam nan an hmang leh zel tawh a, in chhung hnâwmhnawk eng chi pawh a ṭawih thei leh ṭawih thei lote pawh paih nghal mai loa thil dang ṭangkai zawka hman nawn leh nachâng kan hriat a pawimawh," a ti a, tun aṭang hian ṭan lâk nghal a ngaih thu a sawi.
He hunah hian kalkhawmte'n environment tichhe lo tur leh humhim tura intiamkamna an sawirual a; ‘Waste to Wealth’ tih thupui hmangin thil hluihlâwn, paih mai tawh tur ang chi aṭanga thil siamte pho chhuah niin, mi 71-in thil chi hrang 100 chuang an pho chhuak.
Waste to Wealth Exhibition hi World Environment Day, 2023 lawmna chi khat atan leh Mission LiFE chawilarna atana buatsaih niin, district dangah pawh kalpui mêk zêl a ni a, inelna hrang hrang an buatsaihte chu June 5, 2023-ah result puan a ni ang.