Remna Ni pual thisen pek rûnpui hawng; Mizoram remna ang hi ram dangin neih an chak - CM

Kumina Remna Ni (June 30) pualin June thla chhung zawng Mizorama blood bank hrang hrangah thisen pek huaihawt a ni dawn a, nimin khan Dawrpui Multipurpose Hall-ah chief minister Zoramthanga'n a hawng a, Mizoram remna ang hi ram dangin neih an chak thu a sawi.

Remna Ni puala thisen pek hi Mizoram sorkara GAD bakah, Association for Voluntary Blood Donation (AVBD) leh Central YMA-te ṭanghoin an buatsaih a ni a; CYMA remruatna angin June thla chhungin Aizawla YMA branch hrang hrangin Remna Ni pualin thisen an pe dawn a ni.

CM Zoramthanga chuan, Mizote chu mahni ram leh hnam chhanna atana nunna hlan ngam an nih thu leh chu chu hnam dangin Mizote an ngaihsan chhan a nih thu a sawi a, "Miin vawiina min ngaihsanna awm chhun chu mahni ram chhan nan, mahni hnam dinchhuahna tura nunna pe a, sang tél nuna hlân ngam kan nihna hi a ni a, chu chu kan ropuina leh hlutna, kan hnam kan champion puina a ni," a ti.

Mizoram buai laiin ṭhenawm ramte an rálmuan thu sawiin Zoramthanga chuan, "Kum 1986-ah inremna kan ziak a, ram azawnga ram buai ber kha ram azawnga ram ralmuang berah Pathian kaihhruainain kan lut. Vawiinah kan ṭhenawm ramte an buai em em a, kan unaute Mizoramah an rawn tlan lut ruih ruih a ni," a ti a; Remna Ni chu a ropui thu leh remna aṭanga êng chhuah tur a nih thu a sawi.

Chief Minister chuan, Remna Ni puala thisen petu leh pe tur zawng zawng chungah lawmthu a sawi a; Mizoram remna chu export (thawn chhuah) tura ram hrang hrangin an duh leh neih châk a nih thu a sawi bawk.

AVBD president C Lalnunnema chuan, Remna Ni puala thla khat chhung thisen pek huaihawt chu a vawi khatna a nih thu sawiin, "Remna hi a hlu a, Remna Ni puala thisen pek huaihawt hi a inhmeh hle a ni," a ti a; Remna Ni puala thisen pe turin Mizo mipui a sáwm.

CYMA president R Lalngheta pawhin thu sawiin, ṭhalaite leh zirlaite chu thisen pe thei an nih theih nan zu leh ruihhlo ti lo turin a chah a, "Tun aṭangin invéng ula, inthiar fihlim rawh u. Ruihhlo avangin kan ṭhalaite an thi nasa a, a pawi hle. Thisen hmanga mi nunna chhan turin, mi dang tana malsawmna ni turin taksa hrisel in neih theih nan taksa vawng uluk ang che u," a ti a; Remna Ni pualin YMA-in June thla chhungin a tam thei ang ber thisen pek an tum thu a sawi.

GAD secretary K Lalthawmmawia sawi danin, Remna Ni vawi 38-na lawmna atan thisen pek bakah, tih tur chi hrang hrang a ruahman a; chu'ng zingah chuan - district tina health camp buatsaih, digital flyer & short video making competition, cleanliness drive, peace walk, thing phun, band display (police), painting competition & photography contest, quiz & essay competition-te a tel.

Remna Ni puala thisen pek hawnna inkhawm hman zawhah sikul pahnihin Civil Hospital Aizawl blood bank-ah thisen an pe nghal a; JL HSS NSS-in unit 11 leh Modern HSS NSS-in unit 10 an pe a ni.