Member 12,000 awmna CSS thawktute'n June 15 hmain an thil ngiat tihhlawhtlin phût

All Mizoram CSS Employees Coor-dination Committee (AMCECC) chuan, centrally sponsored scheme hnuaia thawkte hamṭhatna zir chiangtu Study Group rawtna (recommendation) chu June 15, 2023 ral hma ngeia tihlawhtling turin Mizoram sorkar an phût.

AMCECC hruaitute leh department hrang hranga CSS hnuaia thawk pawl hruaitute chu nimin khan an ṭhukhawm a; resolution siamin, June 15, 2023 ral hma ngeiin Study Group rawtna tihhlawhtlin an phût.

AMCECC chuan, "CSS employee-te hamṭhatna tura August 16, 2021-a sorkarin Study Group a din tawh leh Study Group-in recommendation a siam tawh chu tun thlenga a hlawhtlinna hmu loa kan la awm hi pawi kan ti tak zet. June 15, 2023 hma ngeia sorkarin recommendation hi min tihhlawhtlinsak loh chuan kan kal zel dan tur kan ngaihtuah ang," an ti.

CSS hnuaia thawkte chu Mizoram sorkar hnuaiah kum tam tak thawk tawh leh Mizoram hmun kilkhawr ber thlenga hmasawnna hna thawktu an nih thu sawiin AMCECC chuan, "Member 12,000 vel awmin, kan tel loin sorkar department hi a kal thei tawh meuh lo. Hetih lai hian, kan service-ah erawh hamṭhatna dawng ngai lo kan nih avangin sorkar hian a rang thei ang berin regularization scheme leh study group-in a rawt, hamṭhatna dang min siamsak ngei rawh se," an ti bawk.