An party mite a duhsak theihna atan Aizawl North II MLA-in society a din chawp - MNF Media & Publicity

MNF Media & Publicity hruaitute chuan nimin khan Aizawl Press Club-ah thuthar thehdarhtute kawmin, Aizawl North-II bialtu MLA Dr Vanlalthlana chu an party (ZPM) mite a duhsak theihna atana society din chawpah an puh.

MNF Media gen. secretary VL Krosshnehzova chuan, Aizawl North-II huam chhungah local council pakua a awm tih sawiin, "Anni hian hneh takin an veng ṭheuh an enkawl mek. Hei bakah hian YMA, MHIP, MUP leh sporting club hrang hrangte veng tinah hian chak takin an ding ṭheuh. Heng pawlte hi MLA fund pek theih sorkar pawmpui vek an ni," a ti.

Veng tina LC leh pawl rintlak an awm laiin Dr Vanlalthlana chuan Aizawl North Development Society a din chawp nia sawiin VL Krosshnehzova chuan, "Chu pawl a dinchawp hmang chuan a biala hmasawnna hna zawng zawng deuhthaw a thawh tir," a ti a, LC-te leh tlawmngai pawl - YMA, MHIP, MUP leh NGO dangte zah lohnaah an ngaih thu a sawi.

Dr Vanlalthlana'n an party bil duhsakna hleihluak takin a kalpui mek nia sawiin MNF Media hruaitute chuan, "Agency dik leh rintlak tam tak an awm laiin an party bil liau liau an invulh theih nan agency a din chawp duh hi mak kan ti hle," an ti a, agency kaltlanga an hnathawh hlawkna hi ZPM leh an MLA hian an pumbilh mek niin an sawi.

MNF Media tarlan danin, Ramhlun South YMA, Y-Section chuan thuchhuah an siam a, an thuchhuahah chuan 'ZPM, Ramhlun South Unit III-te chuan veng chhung hmasawn nana MLA fund Rs 2,50,000 an hmuh chu Ramhlun South YMA, Y-Section in sak mek sak chhunzawm nan min hlan. Tin, hemi sum aṭang hian Rs 30,000 (12%) chu ZPM Ramhlun South Unit III-te hnenah lawmthu sawi nan hlan lêt a ni' tiin a inziak a ni.

Ramhlun South Branch YMA, Y-Section-te thuchhuah chu thudik tak a nih thu sawiin MNF Media hruaitute chuan, "Thuchhuah aṭanga a lan danah hian, ZPM Ramhlun South Unit III-te hian MLA fund an dawng tih a lang chiang hle. MLA Fund Party unit hnena pek hi danin a phal lo," an ti a, ZPM unit-in YMA in sakna aṭanga 12% an la duh chu mak an tih thu an sawi.

Zawhna chhangin MNF Media hruaitute chuan, Aizawl North Development Society chu Aizawl North-II huam chhunga NGO hruaitu an zawhten an hriat chian vak loh thu an sawi a, "An lungawi loh thawm chu kan hre chiah loa, selna neuh neuh chu a awmin kan hria," an ti.