ZPM-in raltlante tana thawh turin an party mite an ngen

ZPM PAC chu nimin khan an pisa-ah an ṭhukhawm a, Manipur buaina avanga Zo hnahthlak Mizorama rawn raltlante tan an remchang ang ang thawh turin an party mite an ngen.

ZPM chuan, "Manipur-a kan unaute ṭanpui nan party chhungah bawm hun nise kan ti. Sum leh pai mai bakah, thawmhnaw thlengin a thei theiin thawhkhawm turin party mite kan ngen a ni," an ti.

Zirlai tam tak an zirlaite chhunzawm thei lo an awm tih tarlangin ZPM chuan, an zirlai an chhunzawm theih dan tur a theih ang anga ruahmansak thuai turin Mizoram sorkar an ngen.

ZPM chuan Manipur buaina chu Meitei leh tlang mite inkar mai ni loin, Manipur sorkar leh tlang mite inbeihna nia tarlangin, "Manipur sorkar chu buaina ching feltu ni loin, a police commando-te hmatawngah kaltirin buaina siamtuah a ṭang hial," an ti.

ZPM chuan central sorkar chu Manipur buaina-a an che muang lutuk leh raltlante tana rehabilitation scheme a kalpui muang lutuk avanga an dem thu tarlangin, "Meitei leh tlangmite hi engti kawng mahin rorelna pakhat hnuaia awm zui chi an ni tawh lo," an ti a, separate administration siamsak thuai turin central sorkar an ngen.