Social media hi kawtkai titi chauh a ni tih hriat a ṭul - IPR Minister

Pachhunga University College (PUC)-a Political Science dept. chuan nimin khan an college-ah ‘National Seminar on Navigating G20s Presidency: Strategizing India’s Leadership’ an buatsaih a, seminar hawngtu IPR minister Lalruatkima chuan, social media chu kawtkai titi chauh a ni tih hriat a ṭul thu a sawi.

IPR Minister chuan Mizo khawtlanga sumdawng liante an lo luh hunah Mizo mipuiten ṭangkai taka an chhawr ve theih nan inbuatsaih a ngai tih sawiin, "Khawvel hmasawn ruala hma kan sawn ve theih nan kan thiamna tihpun a ngai. Social media buaipui nasa Mizo ṭhalaite hian thutak rintlak leh belhchian dawl kan hriat tam a ṭul," a ti a, social media chu kawtlai titi chauh a ni tih hria a, lehkhabu ṭha leh chanchinbute chhiar tam turin kalkhawmte a fuih.

Lalruatkima chuan, India ramin G20 President nihna a chelh chhungin kawng hrang hrangin hma a la tih sawiin, "A hmalak tum danah ruahmanna fel tak siamin khawvel ram hrang hrang economy rualkhai zawka a kal theih nan te, khawvel ram dangte nena insumdawn tawn dan mumal zawk leh intluktlang zawka a kal theih nante, tunlai thiamna digital leh technology hmanga economy chawisan kawngahte, economy tlakchhiatna laka invenna - regulatory framework tihchangtlunte etc. chu a ngaih pawimawh zual zingah a tel," a ti.

Embassy of France India-a dy. head Feli Visco pawhin thu sawiin, "India ramin G20 President dinhmun a luah chhung hian ram ei leh bar dinhmun siamṭhat dan kawngah te, khawvel ram hrang hrangten harsatna leh chona kan hmachhawn dan turah a ngaihdan thawh chungchangahte, India ramin a vei leh ngaih pawimawh a tarlan theihna tur remchang a ni," a ti a, G20 President a nihna India-in a lâk thu tak thu a sawi.

G20 hi kum 1999 khan din ṭan niin ram hrang hrang 19 leh European Union ramte an tel. Kuminah hian India ram chuan president nihna changin ram chhung khawpui 55-ah meeting vawi 200 a huaihawt dawn a ni. Aizawl khawpuiah pawh B-20 hlawhtling taka neih a lo ni tawh

PUC Political Science department chuan India ramin G20 president nihna a chelh ṭangkaina zirchian nan ni hnih awh national seminar hi an buatsaih a, mi thiam eng emaw zatin thupui thlan bik hmangin thu an sawi ang.