MNF sorkarin raltlante a lo ṭanpui chhan hi vote hmuh belh beisei vang a ni lo - Rajya Sabha MP

Rajya Sabha MP K Vanlalvena chuan May 31, Nilaini khan Champhai district-a Vaphai, Farkawn leh Zawlsei khuate tlawhin, Myanmar raltlante awmna leh an dinhmunte a enfiah. MP chuan, MNF sorkarin raltlante a lo ṭanpui chhan hi vote hmuh belh beisei vang a nih loh thu a sawi.

K Vanlalvena chuan raltlante lo ṭanpui chu Mizo Kristiante nunphunga bet a nih thu a sawi a, "MNF sorkarin raltlante a lo ṭanpui chhan hi vote hmuh belh beisei vang ni loin, kan unauten ṭanpui an mamawh tih kan hmua kan ṭanpui mai zawk a ni," a ti a, khawtlang leh NGO hruaitute bakah mipuite'n raltlante hmangaih taka an lo tuam hlawm ṭhin chu Pathian duhzawng a nih a rin thu a sawi.

Vaphai High School leh Higher Scondary School-te'n an zirlai pawl 10 leh 12-te an pass kim vek puala hun an buatsaih chu Rajya Sabha MP hian a hmanpui nghal.

K Vanlalvena chuan, hmalam huna hlawhtlinna nei turin mi awmthei fa nih leh mirethei fa nihin danglamna a nei lo tih sawiin, "Rilru mumal tak nei chunga tumruhna leh Pathian ṭihna nen chuan lehkha zirte hlawhtlinna tur hi tumahin an dal thei lo," a ti.