Lok Sabha MP hoin Khawzawl DDCMC ṭhukhawm

Khawzawl District Development Co-ordination & Monitoring Committee (DDCMC/DISHA) chu an chairman C Lalrosanga, Lok Sabha MP kaihhruaiin nimin khan DC conference hall-ah an ṭhukhawm. October 2022 aṭanga May 2023 thlengin Khawzawl district-ah mi nawlpuia HIV test mi 707 zinga 14 (1.98%) leh naupai mi 382 test zinga 4 (0.05%) an positive tih tarlan a ni.

C Lalrosanga chuan, district thar ni chunga Khawzawl district-a hmasawnna hmuh tur a awm chho zel chu lawmawm a tih thu a sawi a, "District hrang hrang ka fanna aṭangin CSS-te ṭangkai taka chhawr a ni leh state dangte ngaihtuaha a tiṭha pawl takte zinga Mizoram a awm hi a fakawm a, hei hian thawhhona ṭha a entir a, sorkar laipui duh dan pawh a ni," a ti.

Sorkar laipuiin information technology leh digitization lamah ṭan a la nasa tih sawiin MP chuan, "Harsatna kan tawh loh nan hemi kawngah pawh hian theihtawp chhuaha kan insiamrem ve zel a ṭul. Sorkar scheme pawimawhte mipuiin an hmelhriata an chhawr ṭangkai theih nan zau zawka inhrilhhriatna leh inzirtirna neih a ṭul," a ti bawk.

ṬHUTKHAWMA TARLANTE

▶ October 2022 - May 2023 thlengin Khawzawl district-ah mi nawlpuia HIV test mi 707 zinga 14 (1.98%) leh naupai mi 382 test zinga 4 (0.05%) an positive.

▶ TB rinhlelh test 508 zinga 31-te'n an vei a; nau piang 180 leh thi 6 awmin, infant mortality rate (IMR) chu 33.33 a ni

▶ May 17, 2023 thleng khan MNGREGA hnuaiah job card holder 8,723 an awm a; October 2022 - May 2023 chhungin inhlawhna ṭum 70 siam a ni.

▶ PMAY-G Awaasplus beneficiary 667, tar chawmna/ tar pension dawng 750, hmeithai pension dawng 59 leh rualbanlo pension dawng 19 an awm.

▶ Jal Jeevan Mission kaltlangin Khawzawl district-a khaw 24-ah tuilakna leh in tina tui connection pekna tur project kalpui mek a ni.

▶ Tui connection pekna tura ruahman 4,694 aṭanga 4,237 zawhfel tawh a ni.

▶ NABARD RIDF kaltlangin khaw 6-ah tuilakna zawhfel niin, khaw dang 2-ah thawh mek a ni.

▶ PMGSY kawng paruk (km 80.35) zinga panga (km 67.24)-te thawh zawh tawh a ni.

▶ Ration Card leh Aadhaar thlunzawm hna 99.22% leh beneficiary nena thlunzawm hna 94.72% zawhfel a ni.

▶ PMUY beneficiary 1,043, AAY Card 1,036 hnuaiah beneficiary 2,526 leh PHH Card 4,507 hnuaiah beneficiary 20,444 an awm.

▶ A thlawnin buhfai quintal 9396.85 pek chhuah a ni tawh a, One Nation One Ration Card kalpui a ni tawh bawk.