Zirlaite hnenah Chief Minister's Award hlan

Education department buat-saihin nimin khan Chanmari Veng YMA Hall-ah kum 2023 High School Leaving Certificate (HSLC) leh Higher Secondary School Leaving Certificate (HSSLC) exam-a topper te hnenah Chief Minister's Award hlan a ni a, chief minister Zoramthanga'n a hmanpui.

Chief Minister chuan zirthiamna kungpuiah finna, ropuina, remhriatna, taimakna, tumruhna leh hlawhtlinna a inzemnghet em em tih sawiin, "Zirthiamna hian kan suangtuah phak loh thleng hian kawng min lo hawn sak ṭhin a, midangte tana malsawmna nihna kawng pawh a hawng zau bik ṭhin," a ti.

Pathianin mihringte a siam hian chhia leh ṭha hriatna a pe tel tih sawiin Zoramthanga chuan, "Chumi hmang chuan duhthlan theihna min ruahman sak a, he kan duhthlan theihna hi kan hman thiam a pawimawh," a ti a, zirlaite pawhin an duhthlanna fing taka an hman theih nan rilru fim an put a pawimawh thu a sawi.

Thusawitu dang, Education minister Lalchhandama Ralte chuan, Mizoram sorkarin hun harsa leh khirh tak kum 2 chhung hmachhawn chunga zirna tihhmasawnna tura kawng hrang hranga a theih ang anga hma a laknate pawhin rah ṭha a chhuah mek tih sawiin, "Sorkar sikulah pawh zirlai naupang an pung sâwt hle," a ti.

Chief Minister's Award hian lawmpuina thuziak leh Rs. 50,000 a keng tel. Award hi kum 2013 aṭanga sem ṭan niin, ṭum 11 sem a ni tawh.