KHAWTHLIR

MBBS seat nei dawn tawh lo

Higher & Technical Education department chuan thuchhuah siamin, "NEIGHRIHMS Director hnen aṭanga lehkha kan angin Mizoram leh Arunachal Pradesh-te chuan keimahni puala medical college kan lo neih tak avangin NEIGHRIHMS, Shillong-a MBBS seat kum tina kan lo neih ṭhin chu kum 2023-24 Academic Session aṭangin kan nei dawn tawh lo," a ti. NEIGHRIHMS-ah hian Mizoramin MBBS seat pathum a nei ṭhin a ni.

Mamitah CEO

Mizoram chief electoral officer (CEO) Madhup Vyas chuan nimin khan Mamit district-a tlawh a, Mizoram Election 2023 neih tura Mamit district inbuatsaihna hrang hrangte a enfiah. CEO chuan elections official-te chu ECI duhdante zirchianga, mipui a tam thei ang berin vote an thlak theih dan tur leh inthlanna felfai leh thianghlim a awm theih nana theihtawp chhuah turin a fuih.

Weighing machine

Lunglei addl. DC Liansangzuala Chhakchhuak chuan mipuiten iron rod (TMT bar) bûk tling leh dik ngei an lei theih nan Lunglei district-a iron rod dealer-te chu June 5, 2023 ral hma ngeia electronic weighing machine hmang vek turin a hriattir.

Skill Competition

Serchhip DC Nazuk Kumar chuan nimin khan DC meeting hall-ah Serchhip District Skill Competition, 2023 a hawng. Skill Competition hi June 26, 2023-ah DC conference hall-ah buatsaih a ni dawn a; pawl 9-12 inkar zirlaite tan Junior Group leh kum 18-30 inkar tan Senior Group siam a ni.
A ti­ṭha ber thlanchhuahte hnenah Rs 10,000 ve ve pek a ni ang.

Heroin man

May 31, Nilaini zan khan Dungtlang Police Checkgate duty-te chuan Chungmangbawih s/o Thanhleisum, Thipchang, Myanmar; Malsawmtluanga s/o Lalmawizuala, Zokhawthar leh Parcheri w/o Chungzauk, Zokhawthar nia inchhalte kut aṭangin heroin kg. 1.418 an man a, international market-ah cheng nuai 700 chuang man a ni.

Ngopa-ah pass tharte chawimawi

MZP Sub-Hqrs., Ngopa chuan nimin khan Ngopa Jubilee Hall-ah kumin HSLC leh HSSLC-a distinction leh first division-a pass te chawimawina hun an buatsaih a, bialtu MLA Dr L Thangmawia'n a hmanpui. MLA chuan Kawlkulhah HSS science zirna kumin 2023 aṭanga ṭan a nih dawn thu sawiin, "Lengteng bialin zirna lamah bung thar a kai mawlh mawlh a ni," a ti.

MSU-in Rural Bank hotu kawm

MSU hruaitute chuan nimin khan Mizoram Rural Bank General Manager an kawm a; IBPS RRB hnuaia MRB-a thawk tur lak chungchang an sawipui. MRB-ah Mizo a tam thei ang ber an luh theih nan hmalak an tum thu an tarlang.

Sawhthing enkawl dan zirtir

Khawzawl Krishi Vigyan Kendra (KVK) chuan nimin khan Chhawrtui community hall-ah sawhthing tám vèn leh enkawl dan inzirtirna an buatsaih a, loneitu mi 80 an tel. Chhawrtui khuaah hian kuminah chhungkaw 140-in sawhthing an ching a; nikum khan sawhthing quintal 4,050 tharin, Rs. 1,50,58,440 man an hralh.