PHE dept.-in an lawmman dawnte leh an hmalaknate puang chhuak

PHE department hotute chuan nimin khan an minister Tawnluia, dy. chief minister hoin a pisa-ah thuthar thehdarhtute an kawm a, India ram pum huapa an lawmman dawnte leh an hmalaknate an sawifiah.

PHE dept. hotute chuan, Jal Jeevan Mission (JJM) hnuaiah lawmman pali an dawn thu an sawi a, "Mizorama thlangtlangah in 1,33,060 a awm a, JJM ṭan a nih hnuah in 1,05,627-ah tui connection pek a ni tawh. A hma-a scheme dang hmanga tui connection lo pek tawh in 9,021 nen in 1,14,826 (86%) pek a ni tawh. Hmarchhak state-ah dinhmun sang ber kan luah mek. Mizoramah thingtlang khua (khawper telin) 728 a awm mek a, khaw 316-ah in tinin tui connection an nei vek tawh," an ti.

Kum 2023 chhung hian tui connection 22,485 pe turin target an siam thu sawiin PHE dept. hotute chuan, "Tui connection 4,253 pek a ni tawh. Thingtlanga sikul awm 2,168 zinga 2013 tui connection pek an ni tawh a, anganwadi 1,583 zinga 1,526 hnenah pawh tui connection pek a ni tawh," an ti a, JJM hnuaiah scheme 842 thawh niin, chung zinga 186 chu solar pumping scheme a nih thu an sawi.

PHE dept. hotute sawi danin, JJM hnuaiah hian cheng vbc. 1,529.61 mamawh a ni. Chung zinga vbc. 1,360.19 chu central sorkar aṭanga hmuh tur niin, state sorkar tum tur chu cheng 151.12 a ni a, a bak zawng cheng vbc. 18.30 chu khawtlangin an tum ve tur a ni. Tun dinhmunah central aṭangin cheng vbc. 924.82 leh state sorkar aṭangin cheng vbc. 90.01 hmuh a ni tawh.

North East Special Infrastructure Development Scheme (NESIDS) hnuaiah PHE dept. hian project pali - cheng nuai 11,419.65 senna tur Alternate Gravity Water Supply Sheme of Aizawl, Augmentation of North Vanlaiphai Water Supply Scheme leh Augmentation of Greater Mamit Water Supply Scheme Part-II thawh an thawk mek a, NABARD hnuaiah project ṭhahnem tak thawh mek a ni bawk.

PHE dept. lawmman dawnte

1. Jal Jeevan Survekshan 2023 (October, 2022 - March, 2023) :
# Fastest Moving Aspirational District Achievers Category : Aspirational District 117 zinga titha 21 thlanchhuah zingah Mamit district pakhatna a ni
# Achievers for Performance Among Aspirational Districts: Aspirational District 117 titha 21 thlanchhuah zingah Mamit district pahnihna a ni
# High Achievers Category : District 740 aṭanga tiṭha zual 127 thlanchhuah zingah Kolasib district pathumna
# Fastest Moving District Achievers Category-ah : District 740 aṭanga titha zual 168 thlan chhuah zingah Siaha district pangana

2. 2nd National Water Award 2019-ah Best Village Panchayat - North East Zone : Leng khua, Serchhip District, pakhatna leh Ailawng khua, Mamit district pahnihna

3. 3rd National Water Award 2020-ah Best Village Panchayat - North East Zone : Sialsir Khua, Serchhip district pakhatna

4. Jal Survekshan Abhiyan 2022-ah Water Warrior Award : Sairep VCP HS Lalawmpuii'n a dawng.

5. Swachh Bharat Mission Awards 2022-ah North East Zone bikah Mizoramin pahnihna a dawng Mizoram 2nd Prize

6. Kum 2021-2022 chhunga SBM-G hnuaiah North East Zone-ah Mizoramin pahnihna dinhmun a dawng a, hei hian lawmman cheng vbc. 1 a keng tel