Special Court-in eiruk thubuaiah thiam loh chantir

Special Judge (Prevention of Corruption Ac) Dr HTC Lalrinchhana chuan nimin khan cheng nuai 268 tihchingpen thubuaia Anti Corruption Bureau (ACB)-in an man Mustagur Rahman, Guwahati chu thiam loh a chantir.

Vanglaini thudawn danin, Mustagur Rahman lakah hian MAMCO sum cheng nuai 268 eirûknaah ACB chuan December 3, 2015 khan thubuai an ziak lut a; an chhuinaah khatih laia MAMCO deputy manager Lalremthanga leh a consultant Mustagur Rahman hi inhnamhnawiha puh an ni.

ACB chuan Lalremthanga leh Mustagur Rahman-te hi an man a, interim bail hmangin Court-in a chhuah a ni. A hnuah Guwahati High Court, Aizawl Bench chuan Mustagur Rahman bail dilna a hnâwl a, court hniam zawka kal turin order a siam a; mahse, Rahman chu court hniam zawkah inlan loin a tlanbo zui a ni.

Lalremthanga chu Special Judge (Prevention of Corruption Act) chuan November 22, 2022 khan thiam loh a chantir a, kum 5 chhung táng tur leh Rs. 5,00,000 chawi turin a hrem. Gur Rahman man phalna (warrant of arrest) pawh court chuan a tichhuak nghal.

ACB chuan warrant of arrest bawh-zuiin Mustagur Rahman chu an zawng reng a, Mizorama IPS officer lo thawkte puihnain February 24, 2023 khan man a ni. Hrem a nih dan tur chu June 5, 2023 hian Special Judge chuan a puang ang.