AMC 2023-24 budget pharh a ni

Aizawl Municipal Corporation (AMC) chuan nimin khan AMC meeting hall-ah Board of Councillors meeting an ṭan a, mayor Lalrinenga Sailo-in kaihruaiin, kum 2023-24 chhunga AMC budget a pharh.

AMC BoC meeting hi ni hnih awm tur a ni a, June 5, kar leh Thawhṭanniah chhunzawm a ni ang. AMC budget thar pharh ni mah se, pawm a la ni lo a, meeting chhunzawm leh hunah pawm beisei a ni. Budget hi executive councillor (Cash & Accounts) Lalringliana'n a sawifiah a ni.

Nimina AMC BoC meeting-ah hian corporator pahnih - Ward-III bialtu Rosiam­ngheta leh Ward-XIII bialtu Lalfakzuala Chenkual-te motion put luhte sawiho a nih hnuah pawm a ni.

Aizawl khawpuia restaurant, hotel leh hostel-te AMC Licensing Regulation, 2012 hnuaia ziah luh (register) an nih angin, Licensing Regulation hnuaiah an thianghlim dan leh inenkawl dante endik ṭhin ni rawh se, an ti.

Mizoram sorkara Health department-in dengue leng darh zau zel tur dopui tura AMC an ngenna chu an pawm a; dengue donaa hmalakna atan AMC chhunga veng hrang hrangte'n an hman theih turin fogging machine lei an remti.

AMC-in lei laih khuahkhirhna dan a hman mek AMC Site Development and Slope Modi­fication Regulations, 2007 chu tun aia mipui tana awlsam leh zangkhai zawka hman leh kalpui a nih theih nan hmalak a remti bawk.