Candidate beisei vanga làr khèlah ZPM ṭhalaiin MNF Media GS puh
ZPM ṭhalai chuan thuchhuah siamin, MNF Media & Publicity general secretary VL Krosshnehzova chuan MNF ticket-a Ṭawi biala din a beisei vanga lar khelah an puh.
VL Krosshnehzova hian Aizawl North-II bialtu MLA Dr Vanlalthlana'n MLA fund a hman dan chungchangah June 1, Ningani khan thuthar thehdarhtute kawmin, thu belhchian dawl lo leh thudik hai derin Dr Vanlalthlana a bei nia tarlangin ZPM ṭhalai chuan, "Hei hi a chhan ber chu MNF ticket-a Ṭawi biala din a beisei avângin a thiam ang angin lar a khel veah kan ngai. Intheh lâr a tumnaah hian dawt thu leh thu belhchian dawl lo pawh a pawisa lo tih hi Zoram mipuite hmuh dan a ni," a ti.
ZPM ṭhalai tarlan danin, Dr Vanlalthlana hian a bialah hian implementing agency atan dan hnuaia society registered thlap, Aizawl North Development Society (ANDS) chu February 23, 2022 khan MoU ziah puiin, mipui hriat theih turin TV leh chanchinbu lamah pawh pekchhuah a ni. Implementing agency ruat a nih danah hian MLALADS (MLA fund) kaihhruaina dan engmah kalh a awm lo.
Dr Vanlalthlana hian veng tina Local Development Committee WhatsApp group-ah, an veng chhunga sanction a siamna lehkha chu a tarlang nghal zel.
ZPM Ṭhalai chuan Dr Vanlalthlana aia NGO leh sporting club hnena MLA fund pe hnem MNF MLA zingah an awm an rin loh thu tarlangin, "NGO leh sporting club hruaitute leh member-te'n ngaihsaktu an neih avanga an lawm viau laia, bialtu MLA-in anmahni a hnuai chhiah ang a Pu VL Krosshnehzova'n a tarlang ta mai hi NGO leh sporting club-te hmuhsitna-ah kan ngai a ni," an ti.
VL Krosshnehzova'n Ramhlun South YMA Y-Section hna chungchanga Dr Vanlalthlana a beihna pawh hi hre reng chunga mimal inbeihna-ah an ngaih thu leh, kha thilah khan file a kal thui hmain Dr Vanlalthlana hian a cancel vek tih pawh an tarlang bawk.