Kum 2022-2023 ah sorkarin ILP 1,16,420 a pe chhuak

Proples' Conference (PC) party hruaitute chuan nimin khan Aizawl Press Club-ah thuthar thehdarhtute an kawm a; Inner Line Permit (ILP) dan ennawn tur leh khawng taka ILP inkaihhruaina dan lekkawh turin Mizoram sorkar an phût a; Home department-in a chhinchhiah danin, April 2022 - March 2023 chhung khan district 11 leh Mizoram House paruk aṭangin ILP 1,16,420 pek chhuah a nih thu an tarlang.

PC party vice president Lalrinzuala chuan, ILP hmanga Mizorama lo lut leh chengte chu dan anga en zui reng an ngaih thu a sawi a, "A chhawrtuten dan kan ngaihthah avangin permit mila awm chhan ang ni loa awm leh awm theih chen aia rei awm, man chhuah leh hrem ni lo an tam hlein a rinawm. Sponsor mawhphurhna nia danin a sawi milin dan kenkawh ni se," a ti a, ILP nei dan bawhchhiate chu sponsor tuten sum an chawi bakah, a thawn haw pawh an kut tur a nih thu a sawi.

Online portal hmangin permit neitu leh sponsor leh permit dam chen a chhui theih vek tih sawiin Lalrinzuala chuan, "Hei hi hman ṭangkai ni se, tun aiin permit mumal lo vanga dan bawhchhiatna te, zirlai pawl leh YMA-te buaina hi a ziaawm ngei ang," a ti a, sorkarin khawng takin ILP dan hi keng kawh se an duh thu a sawi.

PC party hruaitute chuan Mizoram tan trading by non-tribal dan neih a rem loh avangin hnam dangin sumdawnna an kalpui nasa tih an sawi a, "Min chim ral mek a ni. Value Added Tax hman lai khan MVAT Act, 2005 registration neite chu ILP kum 2 chhung atan pek an ni ṭhin. GST hman a nih hnu hian registration ti duh apiang tan tih theih a ni. Kan tualzawla hnam dang sumdawng kan thunun theih nan Mizo sumdawngte ṭhatpui tham turin dan hnuaiah 'royalty fee' lak a nih theih nan sorkarin hma la se," an ti a, GST Act hman a nih tawh avangin Mizote himna tur thlira ILP kenkawh dan thar siam a ṭul tawh thu an sawi.

PC party tarlan danin, Home department-in a chhinchhiah dan chuan April 2022 - March 2023 chhung khan district 11 leh Mizoram House paruk aṭangin ILP 1,16,420 pek chhuah a ni a; Kolasib district-ah ILP pek tam berin mi 49,073 hnenah an pe a, Mumbai Mizoram House-in ILP 11 pe chhuakin an pe tlem ber a ni.