Thawhhona a ṭhat avangin India ramah Covid-19 tuar nep ber pawl kan ni - Health Minister
Health & Family Welfare minister Dr R Lalthangliana hoin nimin khan DHME conference hall-ah Health department hnuaia peng hrang hrangten kum 2022-2023 chhunga hma an lak dan thlirletna neih a ni. Health Minister chuan thawhhona a ṭhat avangin Mizoram chu India rama Covid-19 tuar nep bawr pawh kan nih thu a sawi.
Dr R Lalthangliana chuan, Health department hnuaia peng hrang hrangte hnathawh lawmawm a tih thu a sawi a, "Chutihrual chuan hmasawnna tur kawng tam tak a la awm a, induhkhawp lohna pawh kan nei ang, kan thlen chin aṭang hian hma kan sawn zel tur a ni. Covid hripui dona kawngah HFW hnuaia thawkte'n theihtawp chhuaha an tih tur an tih ṭheuh avang leh department dangte nen kan thawhhona a ṭhat avangin India ramah a tuar nep ber pawl kan nih phah," a ti.
Health department a enkawl ṭan tirh aṭangin a tihchangtlun nan theihtawp chhuahin ruahmanna an siam tih sawiin Health Minister chuan, "Vanduaithlak takin Covid hripui leng vangin kan duh angin hma kan la chak thei ta loa, a bik takin thawktu indaih lohna phuhruk kawngah kan tum ang aiin hma kan la chak thei lo hi a pawi takzet. Chutihrual chuan doctor engmawzat kan lak belh a, nurse pawh ṭhahnem tak kan lain, Health & Wellness Officer-te pawh kan la nual," a ti a, a theih ang angin staff dangte pawh an lak thu leh mamawh phuhru zo lo mahse theihtawp an chhuah reng tih a sawi.
Dr R Lalthangliana chuan, "A pawimawh ber chu mi nunna chhan tur leh damlo mangang natna tuarte leh an chhungte tana thlamuanpui tham kan nih hi a ni a, hemi atan hian ni tin mahni intiam tharin rilru kan siam thar zel a ngai," a ti a; karleh lawkah NITI Aayog-a Health changtu Dr VK Paul leh sorkar laipuia HFW official pawimawhte'n Mizoram rawn tlawha HFW official-te nen inkawm an duh dawn thu a sawi bawk.
Thlirletna hunah hian district tina CMO leh medical superintendent-te, National Health Mission, Zoram Medical College, AYUSH, MSACS, Mizoram State Cancer Institute leh HFW hnuaia peng hrang hrang aiawhte an tel.