Mi thil chîkmi leh intellectual ho chuan MNF in ropui khawp mai an ti - MNF Adviser

MNF chuan nimin khan Hnam Runah chhung inkhawm an hmang a, he huna thusawitu MNF adviser Lalchhandama Ralte, minister chuan mi thil chîkmi leh intellectual ho aṭanga 'MNF hi in ropui khawp mai' tia fakna a dawn thu a sawi.

MNF Adviser chuan kum 2018 aṭanga an sorkar hnuah Covid-19 vanga inkhuahkhirhna hrang hrang vangin an sorkar kum 2 leh thla 2 chiah mumal takin an la kal tih sawiin, "Mi thil chîkmi leh intellectual ho chuan 'MNF hi in ropui khawp mai, hun harsa khawvelin a tawh laia mipui inngaihsak dan te, ram in kalpui dante leh state dang zawng zawngte ngaihtuah chuan ram inkalpui dan hi hotu mumal tak nei in ni tih a hriat' tiin fakna thu kan dawng a ni," a ti.

MNF Adviser chuan an khingpuite chungchang sawiin, "Tunhnaiah Congress party an inban phengphung a, an PAC-te an ṭhiat a, block-te an bang. ZPM nise nimin lawkah pawh an PAC-te nilengin an ṭhu a, an phur lutukin bial viltu mi 35 an puang chiah mai chu an hniam ta ruai ruai. Vawiinah chuan bialtin an invil thuah sup sup ta mai," a ti a, a tawpah chuan mipuite hian MNF nge nge an sorkar leh dawn tih chu office leh tualzawl titi a nih leh tak thu a sawi.