Mizote rorelna pakhat hnuaia awm hi MNF leh CM tum lian ber a ni - MNYF President

MNF ṭhalai president Dr L Thangmawia, MLA chuan, Mizote rorelna pakhat hnuaia an awm chu MNF party leh chief minister Zoramthanga thil tum lian ber a nih thu a sawi.

Dr L Thangmawia hian nimin khan MNF Lengteng South Block, North Zone-in Pawlrang Community Hall-a political training an buatsaih a hmanpuinaah thu sawiin, "Zo fate rorelna pakhat hnuaia kan awm hi MNF leh CM Pu Zoramthanga thiltum lian ber a ni. Hemi tihlawhtling tur hian MNF chuan ke a pen zel dawn," a ti.

MNYF President chuan, malsawmna dawn hmasak beisei leh hlawkna chauh um loa ram leh hnam leh khawtlang dah hmasatu nih tum turin MNF hruaitu kal khawmte a chah a; rinawm tak leh taima taka thawktute hnenah Pathian malsawmna a thleng ṭhin niin a sawi.

Dr L Thangmawia chuan, MNF sorkar term chu kum 2020 tir lam aṭanga Covid-19 lengin kum hnih dawn a pawh tawisak ang a nih thu a sawi a, "Hemi chhung hian Mizoram sorkar chuan ram hmasawnna lam aiin mipui dam khawchhuahna a ngai pawimawh hmasa a ni," a ti a; Myanmar, Bangladesh leh Manipur tualchhung buaina avanga Mizoram beltu Zo hnahthlakte chu Mizoram sorkarin a theihna zawng zawngin a lo kuangkuah thu leh an tan theihtawp a chhuah zel dawn thu a sawi bawk.