Eirawngbawlna gas leh buhfai pekchhuahna lamah harsatna kan nei lo hi a lawmawm - FCSCA Minister
Food, Civil Supplies & Consumer Affairs (FCSCA) minister K Lalrinliana chuan nimin khan Mamit district civil supplies officer (DCSO) pisa thar a hawng. Minister chuan, "Kan ram a rethei hle nachungin Pathian khawngaihna azarah eirawngbawlna gas leh buhfai pekchhuahna lamah harsatna kan nei lo hi a lawmawm," a ti.
Khuallian chuan thu sawiin NABARD hnuaia Administrative buliding sakna tur sum hmuh theih a ni lo nachungin Supply Godown satu Contractor te'n an Godown sakna atanga hlawkna an hmuh pawhkhawm atanga Mamit DCSO Office building thar puitlin theih a ni chu thil lawmawm tak a nih thu sawiin he hna puitlin theihna tura thathawhtu leh khawtlang mipui tawiawmna zawng zawngah lawmthu a sawi.
K Lalrinliana chuan, Pathianin Mizote chu hmun hrang hrangaah a dah rualin a humhim a, a hruaikhawm mek tih a sawi a, "Mizo hnam inunauna chu a chakin a ṭha telh telh a, kan ram a rethei hle nachungin Pathian khawngaihna azarah eirawngbawlna gas leh buhfai pekchhuahna lamah harsatna kan nei lo hi a lawmawm em em a ni," a ti.
Mizoram ṭhenawm state-te'n kawngpui leh rel kawng block ṭhin mah se, Pathian remruatnain an kal zel dawn tih sawiin Minister chuan, "Kan ram, kan hnam hi huaisen takin Pathian thlazarna hnuaiah hmalam panin kan kal zel dawn. Taima leh inlungrual takin, kan unau raltlante nen kan awmho chuan hnam ropui takah kan awm thei tih hriaa inngeih tlâng taka chenho a pawimawh," a ti bawk.
Mamit bialtu MLA H Lalzirliana pawhin thu sawiin, "Ram pumin hripui leh raltlan avanga harsatna kan tâwk chungin ei leh bar, buhfai leh eirawngbawlna gas lamah te harsatna kan nei lo hi Minister hmalakna leh remhriatna vang a ni. Kan ei leh bar tur mai pawh ni lo, ration card-a chuâng lo raltlan tam tak kêp thei khawpa buhfai bikah pawh kan hnianghnar thei hi thil lawmawm tak a ni," a ti.
DCSO pisa hi cheng nuai 100 sengin Babie Construction & Consultancy-te'n an thawk a; feet 60x40-a zau niin, staff-te luah tur pindan pasarih, basement-ah pindan pathum leh mikhual thlenna tur dormitory a awm bawk.