Mizo zirlaite chawimawina hlan

Mizo Zirlai Pawl (MZP) Headquarters, Lunglei chuan nimin khan Saikuti Hall-ah HSLC leh HSSLC examination 2023-a Mizo zirlai ti ṭhate leh zirna-in ti ṭhate chawimawina hun an buatsaih a, minister Lalrinawma'n a hmanpui.

Lalrinawma chuan, ṭhalai ten ngaihsan tur dik an hriat a pawimawh thu a sawi a, "Zirlaiten tawrhchhelna in neih a ṭul a, harsatna hmachhawn thei tura inbuatsaih a ngai. Mahni inkhawngaihna hi hlawhchhamna bulpui a ni a, eng hna emaw in thawh hunah rinawm leh diktakin thawk ula, mahni dinhmun ang zelin hnathawh tur awmte thawh hreh tur a ni lo," a ti a; ruihtheihthil leh mipat hmeichhiatna hman sual kawngah inveng turin a fuih.

He hunah hian Lunglei khawpuia Mizo zirlai, distinction-a pass chin - HSLC zirlai 71 (mipa 39 leh hmeichhia 32) leh HSSLC zirlai 25 (mipa 15 leh hmeichhia 10) bakah, 100% pass result nei zirna-in 12 hnenah chawimawina citation hlan a ni.