Mumal zawka thisen pek dan tur sawiho

Association for Voluntary Blood Donation (AVBD), Mizoram chuan nimin khan Synod Office-ah kohhran ṭhalai pawlte leh pawl dang hruaitute pualin inràwnkhawmna an buatsaih a, pawl hrang hrangin zing zawka thisen an pek theih dan tur sawiho a ni.

Inràwnkhawmna hi AVBD president C Lalnunnema'n a kaihhruai a; AVBD hruaitute bakah, State NSS Officer, Central KṬP, Mizoram ṬKP, Territorial SAY leh General PYD aiawhte an tel. Civil Hospital, Aizawl Blood Bank-a head of department Dr K Rothangpuia'n blood bank-te dinhmun leh thisen an mamawh dante a sawifiah.

C Lalnunnema chuan, thiamna leh hmanraw changkâng zelah thisen mamawh dan a danglam ve zel tih a sawi a, chuvang chuan ṭum khata thisen unit tam tak pek aiin, pek zin a ṭul tawh thu sawiin, pawl hrang hrangte chu ṭum khatah thisen pek ṭeuh tum kher lo a, zing zawka donation camp buatsaih tum turin a ngen.

Dr K Rothangpuia chuan, tunlaia thisen mamawh tam zawk chu thisen varte a ni a, chutih laiin, thisen var (platelets) chu a dam rei lo a, ni nga chauh dahṭhat theih a nih thu a sawi a; thisen an dawn/lâk zingah an hman aiin damdawi-in dang (private hospital, etc.)-in an hman a tam zawk thu a sawi bawk.

Inràwnkhawmnaah hian kohhran ṭhalai hrang hrang aiawhte'n thisen pek an kalpui dan tlangpui an sawi a; blood bank hrang hrangin thisen an tlâkchham loh dan tur leh thisen mamawhte'n a hun taka thisen an dawn theih dan tur sawiho a ni.