CYMA transit camp raltlan 53 in an pan tawh; chak zawka hma la turin CYMA-in sorkar an ngen

Central YMA chuan an office chu Manipur aṭanga rawn raltlante lo chawlh lailawkna (transit camp) atan an buatsaih a, nimin tlai thleng khan mi 53 in an pan tawh. CYMA chuan raltlante dawnsawn kawngah chak zawka hma la turin Mizoram sorkar an ngen.

CYMA executive committee chuan June 2, Zirtawpni zan khan Manipur tualchhung buaina vanga harsatna tâwk, nunau mangang Mizorama sahimna zawnga rawn raltlante chungchang a ngaihtuah a, "Mi eng emaw zatin Mizoram rawn lut tawhin, an la rawn luh belh zel a ni. Chhung leh khat belh tur nei lo, baihvai taka lo thlengte tan sorkarin ruahmanna mumal a siam fel hma chu CYMA Hall hi transit camp-ah buatsaih ni se," an ti a, CEC member aṭangin raltlante lo dawnsawn kawnga mawhphurtu tur an ruat nghal.

Raltlan dawnsawn kawngah CYMA Hall-a leng lo tan Aizawl khawpui chhung branch YMA ṭhenkhatte pawh a ṭul anga lo inring turin CYMA chuan an ngen nghal a, "CYMA chuan Manipur buaina hi a reh thuai theih nan leh boruak muanawm a thlen vat a duh hle a, Mizoram sorkar pawh raltlante dawnsawn kawngah tun aia chak zawka hma la turin kan ngen a ni," an ti.

Nimin tlai thleng khan Manipur aṭanga rawn raltlan mi 53 chuan CYMA transit camp hi an pan tawh a, ei leh in turte lo siam sak an ni. Helai hmuna an chawlh hahdam hnuah ṭhenkhat chu state pawn leh state chhunga chhungte bel turin an chhuak leh, chhungte belh tur nei lote chu Vaivakawn leh Chanmari Branch YMA-in transit camp aṭang hian an la chhâwng a ni.

CYMA transit camp hi pan duh tan chuan mobile phone number 9862162361 leh 8132841290 ahte biak pawh theih reng a ni.