Sahuana ramsate'n thla tin cheng nuai 9 an ei ral
Aizawl Zoological Park-a ramsa chi hrang hrang (species) 49, an vaiin 213-te chuan thla tin cheng nuai 9 an eiral a, sakei pathum-in ni tin sa kg. 27 an eiral.
Sakawrtuichhuna Aizawl Sahuan hi kum 2006 khan Bethlehem Vengthlang aṭangin sawn a ni a, ramsa chenna tur (enclosure) 29 siamin, inthlah punna tur bik hmun li-ah siam a ni. Mizorama ramsa neihsa chi 29, an vaiin 199 a awm mek a; Mizoram chhunga awm ngai lo exotic species chi 49 awmin, a vaiin 213 an awm. Exotic species chenna tur hmun sarih siam a ni.
Aizawl Sahuan hian Central Zoo Authority (CZA) phalnain ramsa inthlengtawn hmangin ramsa an pechhuakin, sahuan dang aṭanga lakluh an nei fo bawk a; tunah hian zâwng hmaisen nupa pawh pekchhuah an tum mek. Nikum leh kumin chhungin state pawn sahuan aṭangin sakei pahnih an lalut a ni.
Ramsa dan loa phurhluh an mante chu court phalnain sahuanah hian dahluh ṭhin an ni a, heng excotic ramsa leh sava te hian thla tin Rs. 1,30,000 man hu an eiral ṭhin.
Sahuan hi Inrinni khan Environment Forest & Climate Change (EFCC) minister TJ Lalnuntluanga hoin chanchin-bumiten an tlawh a ni.
EFCC Minister chuan, sahuan chu tihchangtlun zel tum a nih thu sawiin, sakei dah belh hnuah phei chuan tlawhtu an pung nasa hle tih a sawi a, "Aizawl Zoo hi acres 27 a zau a ni a, tunah hian PTC awm ṭhinna ram chu hlehthlak tumin hmalak mek a ni," a ti.