CM-in a duhsak zawngte a vur nasat vangin kan sum dinhmun a chhia - CLP Leader

Congress Legislature Party (CLP) leader Zodintluanga Ralte chuan press statement ti chhuakin, Chief Minister-in a duhsak zawngte a vur nasat avangin Mizoram sum dinhmun a chhia niin a tarlang.

Zodintluanga chuan, Mizoram sum leh pai dinhmun ṭhat loh chhanah sum leh pai enkawltu ber Chief Minister-in Covid-19 a chhuanlam laiin Lengpui Airport atan te, a tuipui em em hlawhtlinna hmun tur awm si lo rua leh mau atan te, Kamrul-a leh Zoramchhana tante leh a fachuam Robert Romawia Royte state matching share tur sum a awm reng nia sawiin, "Mizo mipui nawlpui tana sum a harsat lai leh sorkar hnathawkte pawhin hlawh an lak mumal theih loh laiin tute emaw, leh khawiah emaw atana sum a tam si hi thil dik lo tak a ni a, kan ramin a tuar mek a ni," a ti.

Sorkar hnathawkten a hun taka hlawh an lak theih lohna a rei tawh tih tarlangin CLP Leader chuan, "Sorkarin a hnathawkte hlawh tur a release ringawt pawh ruling party worker-ten intihtheihna atana an hmang hian kan sorkar dinhmun a hril chiang hlein ka hria. Tin, kan sorkar hian IFMIS tifel lote tan hlawh a pe chhuak loa, a chhanah central sorkar nawrna vang niten an sawi ṭhin," a ti a; central sorkar-in state-te ti tura a tihah state-in harsatna a nei a nih chuan central-in a pawng nawr chiam ngai loa, an inchinfel hun a nghak ṭhin niin a sawi.

CLP Leader chuan IFMIS kalpuina atana cheng vbc. tam tak sèn a nih thu tarlangin, "Hetihlai hian sorkar hnathawkte IFMIS-a an inthunluh zung zung theihna atana sorkarin hma a lak loh dan aṭang hian sorkar hnathawkte hlawh tur a hlawma pek chhuah tur a neih theih meuh tawh loh avangin Mizoram sorkar hian IFMIS chhuanlamah ka ngai," a ti.

Tun hnaiah Mizoram sum dinhmun a chhe hle tih tarlangin Zodintluanga chuan, "Kar khat dawn Treasury khar ni chiah si lo, khar tlukin kan awm a ni. Sum harsat chhanah Covid-19 an chhuanlam a, Covid-19 boruak reh hnu kum 2 velah pawh sum harsatnain ziaawm lam a pan chuang loa, kan harsa telh telh zawk a ni. Hei hian chiang taka a tihlan chu kan CM hian sum leh pai a enkawl thiam loh piah lamah, a duhsak zawngte a vur nasat avanga kan sum dinhmun hi chhe zawk a ni tih a tichiang," a ti a, CM chu chhuanlam zawng kual loa, sum leh pai dinhmun siamṭha tura theihtawp chhuah turin a ngen.

CLP Leader chuan Mizoram mipui an harsat tulh tulh lai hian Mizoram CM-in a duhsak zawngte bank account a pun thur thur a rin thu tarlangin, "Kan CM bik erawhin a account-a dah loin, a naute pawisa a kawl ang deuha thil a kalpui ka ring thung," a ti.