KHAWTHLIR

Observation Home

Social Welfare & Tribal Affairs (SWTA) minister Lalrinawma chuan June 3, Inrinni khan Serchhip Kawlri tlangah SWTA dept.-in dan kalha che kum 18 la tling lo mi 25 enkawl theihna tura a siam Observation Home a hawng. Home hi Rs. 87,45,000 sengin SWTA dept.-in an sa a; Rs. 55,82,953 sengin main building leh superintendent office building sak nan Rs. 31,62,047 hman a ni.

Tlangzarh

Art & Culture minister R Lalzirliana chuan May 3, Inrinni khan Vaivakawn Auditorium-ah Hliappui Lal Suakphunga Sailo Documentary a tlangzarh a; Aizawl mayor Lalrinenga Sailo pawhin Mizo film ‘Rauthla’ a tlangzarh. Minister chuan, ṭhangtharte chu Mizo nih ti nuamtu - aia upa zahna te, tlawmngaihna leh harsa zawkte ṭanpui duhna thinlung pu zual zel turin a fuih.

GAC Graduation

Govt. Aizawl College chuan June 3, Inrinni khan Dawrpui Multipurpose Hall-ah Graduation Day an hmang a, kumina an college aṭanga BA leh B.Com zir zo mi 684 an thlah. GAC-ah hian under graduate course-ah subject pakua leh education-ah master degree zir theih a ni. Tunah hian zirlai 2,188 awm mekin, zirtirtu 61 leh thawktu dang 15-in an enkawl a ni.

Saphu káwr man

Assam Rifles-te chuan June 3, Inrinni khan Zokhawthar leh Melbûk inkarah maxicab pakhata chuangte hnen aṭangin dan loa Myanmar lam aṭanga lak luh saphu káwr kg. 44 vel an man a, cheng nuai 44 vel hù a ni. Saphu káwr kengtu/neitua puhte chu Lalmuankim (39) s/o Zotuawnga, Chanmari West leh Issac (38) s/o Kaphranga, Zemabawk te an ni.

National Bravery Award

Kolasib DC John LT Sanga chuan thuchhuah siamin, Indian Council for Child Welfare hnuaiah naupang kum 6 – 18 inkarte tan September 1, 2023 thleng huaisen lawmman - National Bravery Award dil theih a nih thu leh, office hun chhungin DC pisaah dilna thehluh theih a nih thu a tarlang.