Lunglei dist.-ah ruihhlo kaihhnawih thubuai 41 ziaklut tawh; 'Ruihhlo tawlh lamah raltlante thui tak an inrawlh' - END

Social Welfare & Tribal Affairs minister Lalrinawma, Excise & Narcotics enkawltu ni bawk hoin tunhnai khan Lunglei DC conference hall-ah sorkar hotu te, kohhran, pawl leh khawltang hruaitute'n ruihhlo do kawnga hmalak dan tur an sawiho a; Excise & Narcotics department (END), Lunglei hotute chuan, ruihhlo tawlh lamah raltlante thui tak an inrawlh ngei tih an hmuhchhuah thu an sawi.

Minister Lalrinawma chuan, Mizoram chu ruihhloin nasa takin a luhchilh mek tih a sawi a, "Ruihhlo do kawngah mi tinten ṭan kan lak a ṭul takzet a ni," a ti a, theihtawp chhuah turin kalkhawmte a chah.

Ṭhutkhawma tarlan danin, kuminah January - May thla chhung khan Lunglei district-ah ruihhlo kaihhnawih thubuai 41 ziahluh a ni tawh a, hengah hian mi 46 man an ni. Thla 5 chhunga ruihhlo mante chu - heroin gram 635, ganja gram 597, alprazolam mum 382 leh khuh damdawi 892 a ni.

Heng thubuaiah hian Myanmar raltlan man anla awm lonain, thubuai chhuinaah ruihhlo tawlh lamah hian raltlante thui tak an inrawlh ngei tih an hmuhchhuah thu END hotute chuan an sawi.

Lunglei district-a ruihhlo do kawnga beihpui thlak nan Mizoram sorkarin Rs. 7,00,000 a pe a; Lunglei district-a Middle School, High School leh Higher Secondary School 52-ah June-July, 2023 chhung hian awareness campaing neih tum a ni. Ruihhlo donaa hmalakna atan - roadshow, painting competition, slogan inziahsiak, short film competition, student rally-te buatsaih tum niin, ruihhlo do kawnga zirtirna leh training pe tur Master Trainer-te pawh MHIP leh Grace Society aṭangin thlan fel tawh an ni.