MLA-in Reiek kàia Tlawng lei dawh a enfiah; PWD-in kuminah zawhfel hman an beisei
Aizawl West III bialtu MLA VL Zaithanzama chuan June 2, 2023 khan Reiek kàia Tlawng lei (bug bridge structure) dawh hna thawh mek a tlawh a; hna viltu PWD hotute chuan kumin chhungin lei dawn hna hi thawh zawh hman a nih an beisei thu an sawi.
VL Zaithanzama chuan, lei dawh hna viltu PWD-te thawhrimna chu fakawm a tih thu a sawi a, "Dampa bial khaw eng emaw zat leh Aizawl inkalpawhna Reiek kài Tlawng lei hi lirthei lian leh mipui mamawh tam tak thiar luhna hmun tur a nih dawn avangin a pawimawh takzet a, rokhawlhna leh harsatna hrang hrang avanga kum eng emaw zat hlamchhiah leh hnathawh mumal awm loa a awm hi a pawi takzet. Tun dinhmunah ṭha taka hmalakna a kal chho ta hi a lawmawm," a ti a, ṭha taka hna thawh a nih zel theih nan an vilpui reng dawn tih a sawi.
Lei dawh hna thawktu Sadguru Engineer & Allied Services Pvt. Ltd.-te chuan, an hnuaia hna thawkten harsatna hrang hrang an tawh thu leh tun hnaiah pawh nunna chán hial an awm thu an sawi a; chak zawka hnathawh an tum thu an sawi bawk.
ZPM Media & Publicity department tarlan danin, Reiek kài Tlawng lei hi Sadguru Engineer & Allied Services Pvt. Ltd., Assam-ten kum 2017 aṭangin siam hna an thawk ṭan a; Mizoram PWD leh Sadguru Engineer & Allied Services Pvt. Ltd.-te inremna ang chuan February 28, 2019-ah zawh fel tur a ni. Hna a kalmuan avangin May 31, 2021 thleng atan an zawh hun tur hi pawhsei sak an ni.
PWD hotute chuan Sadguru Engineer & Allied Services Pvt. Ltd. hnenah hian insawifiah tura hriattirna - show cause notice ṭum hnih leh superintending engineer (Central Circle) aṭangin ṭum khat an pe a, hemi hnu hian February 28, 2023-ah hna thawh zawh an intiam a ni. Lei dawh zawh hun tura tiam vawi thum awm tawhin, a hnuhnung ber February 28, 2023-ah pawh hnathawh mumal hmuh tur a la awm lo a, tun dinhmunah hian structure bik zawh hnaih a ni tawh.
Reiek kài Tlawng lei zau zawng hi metre 7.5 (double lane) a ni a, a san zawng metre 7 niin, metre 55 a sei a ni.