CS-in Champhaia sorkar hmalaknate a enfiah

Chief secretary Dr Renu Sharma chuan June 3, Inrinni khan Champhai khawpui leh a chhehvela sorkar project-te tlawhin a enfiah a; project-te chu a nihna ang tur taka chhawr ṭangkai a ṭul thu leh a hun taka zawhfel bakah, hna tlo leh ṭha, ram tana rotling ni ngei tura siam a pawimawh thu a sawi.

Dr Renu Sharma chuan, sorkar leh pawl anga hmalakna hrang hranga bawhzui ngai leh sorkar anga umzui ṭulte chu ngaihtuah zui tum a nih thu a sawi a, "Sorkar hmalakna project pawimawh tak takte a nihna ang tur taka chhawr ṭangkai a ṭul. A hun taka zawhfel mai bakah, hna tlo leh ṭha, ram tana rotling ni ngei tura siam a pawimawh a ni," a ti.

Chief Secretary hian PHE department kaltlanga Non Lapsable Central Pool of Resources (DoNER) sum cheng vbc 19.88 senga siam Keilungliah tuikhuah te, UDPA department hnuaia Solid Waste Management Centre (SWMC), Mualkawia kalpui mek te a tlawh a; hmabak la awm angte thawh chhunzawm thuai a nih theih nan fund pek chhuah leh tur chungchanga ṭulte a bawhzui nghal.

Zokhawthar khuaa land customs station (LCS), immi-gration check post (ICP) leh 42nd Assam Rifles COB-te Chief Secretary hian a tlawh a; SASCI sum cheng vbc 15 senga Zokhawthar LCS tihchangtlun hna kalpui mek te, PMAY-G hnuaia insak ṭanpuina dawngtu leh Zokhawthar Fair Price Shop-te tlawhin, an hmalak dante a enfiah nghal bawk.