India rama college ṭha 34-na - PUC University ṭha 76-na - Mizoram University

National Institutional Ranking Framework (NIRF)-in India rama zirna-in sangte ṭhat dan (ranking) a tehna nimina a tihchhuahah Pachhunga University College chu 34-na a ni a; university zingah Mizoram University chu 76-na a ni.

Kumina NIRF Ranking-ah hian zirna-in sáng 5,543 an tel a, college bikah chuan 2,746 an tel a, nikum aiin college 474-in an tam zawk.

Hmarchhak state bik aṭangin college 162 an tel a, chu'ng zingah chuan PUC sang berin, ram pumah college ṭha 34-na a ni a; hmarchhak state-a college dang zingah a ṭha zual 200 (top 200)-a lang pha an awm lo.

University zingah Mizoram University chu 76-na a ni a, hmarchhak state-a university zingah a ṭha ber dawttu niin, Tezpur University, Assam (69-na) chu hmarchhak biala dinhmun sang ber a ni.

Top 100-ah North Eastern Hill University (NEHU), Shillong (80-na) leh Gauhati University, Guwahati (88-na) an lang bawk.

NIRF Ranking 2023 (college category) hi nimin khan sorkar laipuia Education leh External Affairs enkawltu minister of state Dr Rajkumar Ranjan Singh chuan a tlangzarh a; ranking hi sorkar laipuia Ministry of Education tihchhuah niin, ṭum riatna a ni.