Smart City hnuaiah Sanitary Napkin Vending Machine 300 bun a ni tawh; A dahna hmuna thuneituten an refill a ngai

Aizawl khawpui hmasawnna tura din Aizawl Smart City Ltd. chuan Aizawl khawpuia sikul, college leh office hrang hrangah hmeichhiate tan a ṭul huna pads/napkin an lak theihna tur - Sanitary Napkin Vending Machine 300 a bun tawh a; khawl dahna hmuna thuneitute'n an pads/napkin hi an refill a ngai dawn.

Aizawl khawpui sikul hrang hrang aṭanga Vanglaini thu dawn danin, Sanitary Napkin Vending Machine (SNVM) hi nikum khan Aizawl Smart City hian an sikulah a dah sak. Khawl dah aṭanga kar hnih hnu velah SNVM-a dah tur pads/napkin hi pek an nih tur thu hrilh an ni a, hetihlai hian pads/napkin hi dah a ni lo a, SNVM dahna hmunah hian khawl hi hman lohin hun eng emaw chen a awm tawh a ni.

Vanglaini palai zawhna chhangin Aizawl Smart City Ltd. hotute chuan, a tira an ruahman dan chuan SNVM an dahna hmunah hian pads/napkin hi dah vek an tum thu an sawi a, "Kan ruahman dan chuan hmun 300-a SNVM kan dahah hian an mamawh dan a zirin sumdawnna atan pads/napkin hi supply ni se, kan ti," an ti.

Aizawl Smart City Ltd. hotute chuan hmei­chhiate'n SNVM-a pads/napkin hi emergency-ah deuh chiah an la chhuak/hmang dawn nia an hriat tak avangin sumdawnna atana supply hi a hlawk dawn lo tih sawiin, "Chuvang chuan SNVM dahna hmuna thuneitute'n pads/napkin hi dah/refill mai se, SNVM aṭanga pads/napkin lakchhuahna man (Rs. 10) pawh hi an mahniin nei mai se, kan ti leh ta zawk," an ti a, chutiang tur chuan SNVM an dahna hmuna thuneitute hnenah hriattirna an pek mek thu an sawi.